Kreu i Partisë Demokratike Lulzim Basha reagoi sot për deklaratat e kryeministrit Rama, sipas të cilit gjendja e rënduar ekonomike ka ardhur si rezultat i varfërisë së aspiratave të qeverive ndër vite.
Përmes një postimi në rrjetet sociale Basha shprehet se këto janë deklarata të denja me ato të ekstremistit serb, Nikoliç dhe fyejnë pa masë popullin.
“Kryeministri i së keqes tha sot se fajin për krizën dhe papunësinë e kanë shqiptarët, se kanë një ‘varfëri aspiratash’. Kjo arrogancë, cinizëm dhe fyerje e një populli të ngjan me deklaratat e Nikoliçit apo paraardhësve të tij. Shqiptarët janë shquar në histori si njerëz që kanë dashur më të mirën për veten, familjen dhe kombin. Asnjëherë nuk kemi patur problem me aspiratat por me satrapët që centralizojnë pushtetin, që na mbyllin çdo rrugë për të ndërtuar me punë dhe dinjitet, një jetë më të mirë në vendin tonë. Mjaft delirove para kamerave me deklarata haluçinante dhe mashtrime! Shqiptarët nuk vuajnë nga mungesa e aspiratave por nga qeveritarët defiçentë që nuk ngrihen në nivelin e dëshirave dhe pritshmërive të tyre”. tha Basha
Redaksia Online
(JavaNews.al)
