Prej kohësh në qarqet gazetareske dhe ato politike është lakuar fakti se në selinë e PD funksionojnë dy zyra shtypi: njëra që është e kontrolluar nga kryetari “de jure” i PD-së, Lulëzim Basha dhe një nga kryetari ende “de facto” i kësaj partie, Sali Berisha. Rasti më i fundit kur dy deputetët e PD-së, Arben Ristani dhe Gent Strazimiri, votuan në komisionin e mandateve si kolegët e tyre të PS dhe LSI që çështja e mandatit të Mark Frrokut të çohej në kushtetuese, dëshmoi realisht “zyrën paralele të shtypit” në PD.
Nëpërmjet një deklarate të shpërndarë në media që u lakua si deklaratë që doli nga selia e PD-së, u sulmua vendimi i komisionit të mandateve, që kishte dhe dakordësinë e dy deputetëve të PD-së!!. Ristani dhe Strazimiri votuan pro kalimit të çështjes në kushtetuese duke marrë paraprakisht edhe opinionin e Bashës. Ky fakt i thjeshtë në realitet vetëm sa zbuloi edhe zyrtarisht egzistencën e një “zyre tjetër shtypi” në selinë e PD-së, e cila nuk kontrollohet nga Basha.
Burime për JavaNews brenda selisë së PD-së bëjnë të ditur për Javaneës se në jo pak raste janë konstatuar në media deklarata që realisht nuk kanë dalë nga selia qëndrore e PD-së. Deklaratat paralele në jo pak raste kanë vënë jo pak herë në pozitë jokomode edhe kryetarin Basha në takime me ambasadorë, të cilët u referoheshin deklaratave të bëra në emër të PD-së, të cilat në pjesën dërrmuese bienin në kundërshti me vetë qëndrimet e politike të Bashës. Por sikur të mos mjaftonte kjo, në jo pak raste, janë konstatuar edhe deputetë të cilët kanë dalë në konferenca shtypi jo të urdhëruar nga Basha, por nga “zyra shtypit paralele” në PD. Deklaratat paralele ndonëse nuk kanë pasur ndonjë ndikim në jetën politike të vendit, apo të kenë krijuar avantazhe elektorale, ato thjeshtë kanë kristalizuar se kryetari dhe ish-kryetari funksionojnë secili me zyrat e tyre paralele të shtypit në PD. (javanews.al / a.meta)
