Gjatë samitit të Partive Popullore Europiane për Ballkanin Perëndimor, kryetari i PD-së, Lulzim Basha, është shprehur se është shumë e rëndësishme që BE-ja ta përqendrojë energjinë e saj drejt marrëveshjes përfundimtare të njohjes reciproke mes Kosovës dhe Serbisë. Kreu demokrat është shprehur se Kosova duhet njohur nga 5 shtetet anëtare të unionit që nuk e kanë marrë ende këtë vendim. Sipas Bashës, ngjarjet e fundit në kufirin Kosovë-Serbi dhe në Malin e Zi tregojnë sa e brishtë mbetet paqja dhe stabiliteti në rajon, prandaj duhen zgjidhur të gjitha problematikat.
“Vetëm në këtë mënyrë do të hyjmë në një epokë të re të bashkëpunimit dhe zhvillimit. Ngjarjet e fundit në kufirin Kosovë-Serbi dhe në Malin e Zi, tregojnë se sa e brishtë mbetet paqja dhe stabiliteti në këtë rajon. Remineshencat e një të kaluare jo shumë të largët, të përziera me interesa gjeostrategjike të fuqive jo-perëndimore, janë një fitil që mund të ndizet nga momenti në moment.
Siç e dimë të gjithë, problemet e pazgjidhura shumë lehtë mund të kthehen në kriza. Kjo është arsyeja pse është jetike për BE-në që të përqendrojë energjinë e saj drejt marrëveshjes përfundimtare të njohjes reciproke midis Kosovës dhe Serbisë.
Dhe për ta arritur këtë, njohja e Kosovës nga 5 Shtetet Anëtare të mbetura duhet së pari të përfundojë. Asnjë paralelizëm nuk mund të bëhet, asnjë argument nuk mund të justifikojë mosnjohjen e pavarësisë së Kosovës, përderisa Gjykata Ndërkombëtare e Drejtësisë e ka certifikuar atë. Vetëm në këtë mënyrë, Ballkani Perëndimor do të hyjë në një epokë të re të bashkëpunimit dhe zhvillimit, e cila me siguri do të jetë një vlerë e shtuar për BE-në”, është shprehur Basha./m.j
