Pas dështimit të negociatave, kryetari i PD Lulzim Basha ka ashpërsuar tonet dhe ka paralajmëruar përshkallëzimin e aksionit opozitar. Ai deklaroi nga çadra se javën e ardhshme protestat do të pushtojnë gjithë vendin.

“Javën e ardhshme nis bashkimi i armatave paqësore nga Veriu në Jug. Le të bashkohemi në marshimin e javës që vjen, qytet më qytet, qark më qark, këtu në Tiranë dhe në Kavajë, për t’i treguar Shqipërisë dhe mbarë botës se ky vend ka zot qytetarët e tij dhe jo drogën, jo oligarkinë. Të gjitha bashkë në një marshim më të madh se 18 shkurti, do përballemi për Kavajën pa krim, pa drogë, për Shqipërinë pa krim, pa drogë. Beteja jonë do shkojë deri në fitoren e kauzës së drejtë”, tha Basha.

Kryetari i Partisë Demokratike ka shprehur edhe njëherë vendosmërinë e opozitës për t’i shkuar derinë fund kërkesës për qeveri teknike. Pas refuzimit të draftit të paraqitur nga ndërkombëtarët, Basha deklaroi sot nga çadra e protestës se nuk bëhet pjesë e pazareve, por do t’i jepe fund bojkotit vetëm me largimin e Ramës.

“Edi Rama e bëri të qartë se është gati të dorëzojë ministrat e tij, kreun e KQZ, zyrtarët e policisë e këdo tjetër por nuk është gati të dorëzojë karrigen e tij. Merri, ca problemi ka, se kshu funksionon, merr e jep, jap e merr, këtu e kanë mendjen,. Kështu funksionon pazari i peshkut të qelbur nga koka, e duan të bëjnë pjesë edhe Lulzim Bashën. Partia Demokratike dhe unë, dhe aleatët jemi të vendour të qëndrojmë fuqimisht dhe vendosmërisht krahë për krahë qytetarëve të thjeshtë të vendit, krahë për krahë protestuesve të lirisë deri në plotësimin e plotë dhe total të kërkesave që populli ka shtruar për zgjidhje”, deklaroi Basha./a.m.