Kryetari i Partisë Demokratike Lulzim Basha ka përdorur sot procesverbalin e policisë Vlorë si dokument në emisionin “Studio e Hapur” në News24 që sipas tij fakton se ministri i Brendshëm Fatmir Xhafaj gënjeu për ekstradimin e Nazer Seitaj.
Basha tha se financieri i Habilajve është arrestuar me urdhër të prokurorisë së Krimeve të Rënda dhe nuk mund të ekstradohej sepse ishte në hetim nga autoritetet shqiptare.
“Ky person nuk mund të ekstradohet dhe nuk mund të ekstradohet për një arsye të thjeshtë, sa kohë është nën hetim ekstradimi i tij do të dëmtojë hetimin. Këtu ka qenë Ministri i Brendshëm dhe ka thënë në studion tuaj se është arrestuar më datë 20 tetor me urdhër të INTERPOL-it. Ky është mashtrim flagrant për të cilin Fatmir Xhafa duhet të mbajë përgjegjësi jo thjeshtë politike por edhe penale. Ja ku e keni dokumentin e policisë Vlorë, procesverbali kur ky ndalohet me urdhër të Prokurorisë së Krimeve të Rënda për veprën penale për të cilën po hetohet Tahiri dhe Habilaj.
Ky është dokumenti që e vërteton. Xhafaj dy ditë më parë gënjeu, sepse ai e ka këtë dokument. Skandali është edhe më i thellë. Ky proces ka nisur 2 herë dhe filtrat e shtetit kanë funksionuar dhe kanë thënë që ky person nuk mund të ekstradohet sepse Prokuroria e Krimeve të Rënda po e heton. Është një mashtrim bajat i rëndomtë sepse Ministrja e Drejtësisë ka nënshkruar 3 letër-porosi për prokurorinë e Katanias. Janë gjurmët e gishtave të një kupole mafioze për të ndihmuar Saimir Tahirin dhe çështja e tij të zvarritet apo mundësisht të mbyllet çështja”, deklaroi Basha, raporton “BalkanWeb”.
