Kryetari i Partisë Demokratike Lulzim Basha rikonfirmoi qëndrimin për t’i shkuar deri në fund protestës që zhvillohet para kryeministrisë prej 3 ditësh. Ai tha në një lidhje me “Top Story” nga çadra e ngritur përballë kryeminisitrisë se protesta do të marrë fund “kur të kemi qeverinë teknike dhe të zhvillohen zgjedhje të lira dhe të ndershme”.
Basha dha një përgjigje në lidhje me kërkesën e BE për rikthimin e opozitës në Parlament nëpërmjet një deklarate të zëdhënëses Koçijançiç. Basha tha se “ai është parlament fasadë, i deligjitimuar”.
“Nuk e kam dëgjuar këtë deklaratë (Kocijancic), por me duhet të them se ka disa BE. Ka BE që dënon drogën, dënon korrupsionin dhe kërkon reformë në drejtësi. Po ashtu siç ka BE që injoron korrupsionin, drogën etj. Unë i referohem mbështetjes nga rezoluta e Partive Popullore Europiane dhe nga raportet e Bundestagut”.
“Është në kauzë që nuk është vetëm e PD. Kundër kriminelëve në pushtet është kauzë e të gjithëve. Kjo mazhroancë dështoi t’i japë vendit reformë zgjedhore. Zvarritën reformën”, deklaroi Basha.
Por a do të futet në zgjedhje Partia Demokratike nëse kërkesat e opozitës nuk pranohen? Basha deklaroi se “nuk mund të shkohet në zgjedhje pa garantuar votën e lirë, dhe pa opozitën nuk mund të ketë zgjidhje”.
“Është rruga e përballjes deri sa njëra palë të tërhiqet. Garancia e vetem është që vota e qytetarëve të numërohet drejt. Zgjedhje pa opozitën mbajnë vetëm vendet diktatoriale. Zgjedhje pa opozitën nuk do të ketë. Zgjedhje fasadë, zgjedhje me shit-blerje votash nuk do të ketë”, deklaoi basha.
/a.m.
