Nga Rudina Xhunga
Bardhyl Reso është ish-pedagog i inxhinierisë. Është 83 vjeç dhe jeton në Shtetet e Bashkuara prej vitit 1993, vit kur shkoi në Amerikë për të mos u kthyer më. “Nuk isha i persekutuar”, tregon në intervistën e jetës, që më dha për Shqip. Isha i djathtë. Flisja me shokët kundër regjimit, fshehurazi. Gjyshja ime dëgjonte “Zërin e Amerikës” dhe ma bënte me shenja: iku ky. Për Enver Hoxhën.
Akoma e kujton gjyshen dhe nuk ka marrë asnjë pronë nga ato prej të cilave e përzunë gjyshen, dikur komunistët.
Ende ka në vesh momentin kur emri i babait të tij, doli te gjyqi i deputetëve. Kryetar i trupit gjykues ishte babai i Gramoz Pashkos. Vite më vonë, në shtëpinë e Gramozit , ata u mblodhën për të shkruar programet e para të ndryshimit të Shqipërisë.
Duke kujtuar, përmbledhur vëzhgimet dhe reflektuar, Reso shpjegon pse iku në ‘93 nga Shqipëria.
Ai beson se në ato tre vjet kur hidheshin themelet e demokracisë në Shqipëri, ndodhi një vjedhje e madhe. Berisha dhe ish-komunistë të tjerë, i vodhën studentëve dhe të djathtëve, Partinë Demokratike. Kjo sepse studentët por dhe pedagogët e tyre qenë naivë. Këtu fut dhe veten duke treguar në detaje, rrethana e ngjarje të kohës. Ndërsa e djathta vetë kishte frikë, sepse dilte nga një kohë represioni dhe mjaftohej që regjimi ra e druhej të merrte përgjegjësi.
Reso tregon sesi Azem Hajdari u përdor dhe largua, sesi Berisha me ndihmën e Elez Biberajt dhe shumë makinacioneve që e bënë të zgjedhurin e SHBA-së, erdhi në krye duke uzurpuar partinë që themeluan studentët. Reso tregon sesi njerëzit që e rrethonin, ish-pedagogë, elita e vendit, të ardhur nga një varfëri kolektive dhe babëzi e madhe, më pas vodhën e shkatërruan cdo gjë, duke mbetur peng i Berishës në librat e SHIK-ut.
“Nëse regjimi i Hoxhës ishte regjimi i krimit, nga ‘92 – ‘97 erdhi epoka e shkatërrimit”- shprehet Reso, duke fajësuar për gjithçka ideatorin, liderin, Sali Berishën. “Ai ishte, lubi për pushtet”- shprehet Bardhyl Reso, duke mbyllur tregimet e ngjarjeve që jetoi vetë, me fjalët:
“Ai tani është non grata dhe lufta e tij është finale, është për jetë a vdekje. Por e ka të kotë. Amerikën nuk e ka me vete dhe është i mbaruar.”
Bardhyl Reso tregon se nuk e bëri këtë rrëfim që të mbaje anë, ai nuk ka dyshime se Basha është beniamini i Berishës. Arsyeja pse po flas tani, shprehet ai, është se njerëzit duhet të flasin. Mjaft me hipokrizi. E folura e ndershme na bën mirë të gjithëve, edhe PD, që t’i kthehet së djathtës, edhe Shqipërisë që të ecë përpara. Mungesa e sinqeritetit dhe ndershmërisë na la me kokën pas”, – e mbyll Bardhyl Reso, rrëfimin për Shqip në Dritare TV. Rrëfimin e një patrioti. Patriot nuk është vetëm kush nuk e braktis Shqipërinë, por edhe kush nuk e vjedh Shqipërinë, nuk e turpëron, nuk e harron, siç z.Reso bëri. Ai foli pas 30-vjetësh, si një detyrim qytetar ndaj Shqipërisë.
