Deputeti i Partisë Demokratike Gazment Bardhi nuk ka preferuar të japë detaje të hollësishme për kafen që zhvilloi në një lokal paraditen e sotme me Edi Palokën, në përpjekje për të bashkuar demokratët për zgjedhjet vendore të 2022.
Pas mbledhjes së grupit parlamentar demokrat, Bardhi u shpreh se të dy shkëmbyen pikëpamje.
Ai theksoi se demokratët duhet të bashkohen për të dalë fitues në këto zgjedhje dhe u shpreh se njëanshmëria e dëmton këtë proces.
“Në fakt nuk do të zbardh më detaje duke ju kërkuar dhe ndjesë opinionit publik për atë që kam biseduar me z.Paloka. Takimi ka qenë konstruktiv dhe me frymë të plotë mirëkuptimi për të gjetur një mekanizëm që siguron bashkëpunim të sinqertë mes demokratëve. Asnjë prej të dyve nuk ka patur asnjë qëndrim për asnjë çështje të caktuar. Njëanshmëria nuk e ndihmon këtë proces. Demokratët kanë nevojë të jenë bashkë për të mundur Edi Ramën, këtë proces e dëmton vetëm njëanshmëria. Çdo rrugë e njëanshme që synon imponim ndaj një pjesë të demokratëve që mendon ndryshe, nuk do ishte zgjidhje.
Sot kam shkëmbyer disa mendime së bashku me z.Paloka. Kur flas për njëanshmëri flas për pozicione të ngurta të secilës palë brenda grupit parlamentar”, theksoi Bardhi.
/a.r
