Sekretari i Përgjithshëm i Partisë Demokratike Gazmend Bardhi nga foltorja e Kuvendit sulmoi deputetët e maxhorancës dhe kryeministrin Edi Rama, duke i bërë përgjegjës për “humbjen” e PD në zgjedhjet e 25 prillit.
Sipas tij mandati i 3-të i qeverisë Rama nuk do të sjellë asgjë të re, ndërsa shtoi se deputetët e maxhorancës erdhën në pushtet falë ndihmës së grupeve të mafias.
Bardhi: Ju mbani ato letra në duar, por të gjithë e dimë se vini këtu pas një masakre elektorale, sic ishte ajo e 25 prillit, ku ishit aktorë. Ju nuk iu intereson asnjë prej sektorëve që iu mbulon në kuptimin e përgjegjësisë. Ju e dini që nuk keni marrë vota dhe të jepni llogaridhënie.
Ju jeni aty për të shfrytëzuar çdo aset për të marrë pushtetin. Mbajtja e pushtetit me forcë është e vetmja mënyrë që ju dhe shefi juaj të mbroheni nga drejtësia. E dini se grupet famëkeqe u lëshuan me lejen tuaj ditën dhe natën në territoret që keni mbuluar për të bërë të mundur që ju të ngjiteni në ato karrige.
Ju e dini se miliona euro të pista dhe korrupsioni janë arsyeja që ju jeni në ato karrige. Nuk ka asgjë të re në mandatin e 3 dhe vijim i keqmenaxhimit. Shumë prej pakicës sunduese lidhen nga një e përbashkët, duhet të ishin para drejtësisë, por jo në burg futen qytetarët e thjeshtë. Këta kanë zero shans për t’iu shërbyer njerëzve. Krimet nuk fshihen dhe nuk harrohen, do të jetë gremina e pashmangshme.
/a.r
