Partia Demokratike vijon të akuzojë Qeverinë për mënyrën se si po e përballon situatën e shkaktuar nga koronavirusi.
Sekretari i Përgjithshëm i kësaj force politike, Gazmend Bardhi ka deklaruar sot se Shqipëria është vendi i fundit në rajon për ndihmën e dhënë për qytetarët.
Sipas tij, Edi Rama u ka dhënë shqiptarëve aq para sa u ka dhënë oligarkëve për Unazën e Madhe.
“Për shkak të Ramavirusit, Shqipëria është vendi i fundit në rajon për ndihmën ndaj qytetarëve dhe biznesit. Edi Rama ka dhënë vetëm 41.5 milionë euro për 3 milionë shqiptarë, aq sa paguan 2 oligarkë tek Unaza e Re.
Gjendja është shumë e rënduar mga pandemia ekonomike, e shkaktuar prej një qeverie dhe kryeministri të dështuar. Bizneset po mbyllen dhe, bashkë me to, edhe vendet e punës”, shkruan Bardhi në rrjetet sociale.
Ai shton se “kemi humbur 10fishin e vendeve të punës, në krahasim me vendet e rajonit, që do të thotë më shumë varfëri, më pak zhvillim. Shqiptarët nuk e meritojnë të jenë për gjithçka të fundit vetëm se kanë një qeveri që i vjedh dhe i braktis në ditën më të keqe”.
/a.r
