Bardhi ‘autogol’ me videon që publikoi, Policia: Efektivët s’kishin fare armë, dhunuesit do t’i kallëzojmë

Policia e Shtetit ka përgënjeshtruar pretendimin e opozitës se një efektiv i ndërhyrjes së shpejtë i nxorri armën deputetit të PD-së, Luan Baçi.

Në një reagim për mediat pas incidentit të dhunshëm në oborrin e Parlamentit, policia bën të ditur se asnjë efektiv nuk ka qenë i pajisur me armë zjarri.

Sipas Policisë së Shtetit, asnjë prej punonjësve nuk i ka treguar armën e zjarrit protestuesve.

Dhe në fakt, video e mëposhtme tregon sesi një polic i gjendur mes dhunës së deputetëve të PD, mbështet dorën në këllëfin bosh të pistoletës, por kurrësesi nuk nxjerr gjë prej saj.

Reagim i Policisë së Shtetit:

Shërbimet e Drejtorisë Vendore të Policisë Tiranë, me mbështetjen e Forcës Kombëtare të Sigurisë, kanë marrë të gjitha masat për garantimin e rendit dhe sigurisë publike, si dhe për mbarëvajtjen e tubimit të organizuar para bashkisë Tiranë.

Gjatë tubimit është bërë thirrje që pjesëmarrësit t’i drejtoheshin Godinës së Kuvendit.

Shërbimet e Policisë, konform ligjit, forcat policore kanë marrë masa për të garantuar sigurinë e institucioneve shtetërore ne rastin konkret te Kuvendit të Republikës së Shqipërisë për të parandaluar një sulm të mundshëm nga protestuesit ndaj këtij institucioni.

Bazuar në ligjin “Për tubimet”, punonjësit e Policisë, të angazhuar për mbarëvajtjen e tubimit, asnje punonjes policie nuk ka qene i pajisur me armë zjarri gjate tubimit, po vetëm me mjete mbrojtëse dhe me shkopinj gome.

Përgënjeshtrojmë lajmin që punonjës të Policisë, në tubim, iu kanë nxjerrë tubuesve, armët e zjarrit.

Policia e Shtetit është e vendosur për të garantuar të drejtën e tubimit, liritë dhe të drejtat e tjera të qytetarëve, si dhe pronën publike dhe atë private.

Ndërkohë, Policia e Shtetit do të kryejë të gjitha veprimet hetimore dhe shtetasit përgjegjës për veprimet e dhunshme ndaj punonjësve të Policisë, do të kallëzohen në Prokurori.

/a.r