Bardh Spahia, kandidati i koalicionit “Shtëpia e Lirisë” ka fituar zgjedhjet për Bashkinë e Shkodrës.
Pas përfundimit të numërimit të fletëve të fundit të votimit, Spahia ka falënderuar të gjithë bashkëpunëtorët e tij, aleatët e koalicionit si dhe komisionerët.
Ai bëri edhe një ftesë për të gjithë demokratët e tjerë që nuk e votuan, duke thënë se dera për ta do të jetë gjithmonë e hapur.
Ndërkohë, ministrja Edona Bilal e ka përshëndetur fitoren e Bardh Spahisë. Ajo shprehet në Facebook se uron që fituesi të vendosë Shkodrën gjithmonë të parën në vendimarrjet e tij.
“U mbyll gara për Bashkinë Shkodër. Qytetarët me vullnet të lirë caktuan modelin dhe individin me të cilin dëshirojnë të përfaqësohen.
Dua ta falenderoj Majlindën që vuri zemrën e tan përkushtimin e saj në dispozicion. Rezultati i arritur nga ajo edhe pse nuk mjaftoi për të fituar garën, është tregues i vlerësimit jo vetëm nga radhët e Partisë Socialiste por edhe nga qytetarët.
Faleminderit edhe të gjithë mbështetësve të kësaj fushate, rinisë, strukturave partiake dhe gjithë atyre që ndihmuan në organizimin dhe mbarëvajtjen e qetë të gjithë proçesit zgjedhor. Përgëzime për kandidatin fitues. Uroj të vendosë Shkodrën gjithmonë të parën në çdo vendimarrje” – thotë Edona Bilali.
/a.r
