Këshilli Mbikqyrës i BSH-së, në mbledhjen e tij të radhës të mërkurën e parë të çdo muaji, mori në shqyrtim dhe miratoi statutit e ri të Bankës së Shqipërisë.
Në njoftimin për shtyp të publikuar sot në faqen zyrtare të BSH-së, bëhet e ditur se, statuti përbën një ndër dokumentet themelore që përcakton parimet bazë të proçedurave institucionale, administrative dhe operacionale të institucionit, në përputhje me Ligjin për Bankën e Shqipërisë.
Me miratimin e statutit të ri shfuqizohet statuti i mëparshëm, i miratuar nga Këshilli Mbikëqyrës me vendimin nr. 100, datë 19.12.2000, i ndryshuar.Sipas BSH-së, miratimi i Statutit të ri është përfundimi i një proçesi për përshtatjen e dispozitave të organizimit dhe funksionimit të Bankës së Shqipërisë me praktikat më të mira të Sistemit Evropian të Bankave Qendrore, adresimin e rekomandimeve të ndryshme të institucioneve financiare ndërkombëtare si dhe reflektimin e disa ndryshimeve të tjera rregullatore më të hershme.
Disa nga risitë e Statutit janë: përcaktimi i qartë i detyrave dhe përgjegjësive të Administratorëve të Bankës së Shqipërisë; parashikimi i procedurave të qarta në lidhje me zëvendësimin e administratorëve në rastet e mungesës dhe pamundësisë së tyre për të vepruar; riformulimin e dispozitave që lidhen me pavarësinë administrative dhe financiare të Bankës, duke i përafruar ato me dispozitat e Statutit të Bankës Qendrore Evropiane.
Miratimi i strukturës së re të Bankës së Shqipërisë, përveç se përshtat aktivitetin e njësive të saj me nevojat dhe proçeset e reja të punës që imponohen nga zhvillimet ekonomike dhe ndryshimet në legjislacionin bankar dhe më gjerë, synon më së shumti përmirësimin e administrimit të institucionit dhe forcimin e kontrollit të brendshëm. Krijimi i njësisë së specializuar për monitorimin dhe administrimin e rrezikut operacional përbën një hap thelbësor në këtë drejtim. Gjithashtu, me strukturën e re është synuar forcimi i kontrollit vertikal dhe atij horizontal në përputhje me modelet dhe praktikat më të mira te bankave qendrore evropiane.
ATSH
