Ministri i Shëndetësisë, Ilir Beqaj dhe Përfaqësuesja e Përhershme e Bankës Botërore për Shqipërinë, Tahseen Sayed prezantuan sot projektin “Përmirësimi i Sistemit të Shëndetësisë”, një projekt me vlerë 32 milionë euro.
Në fjalën e saj, Përfaqësuesja e BB për Shqipërinë, theksoi se “është shumë e rëndësishme që çdokush në Shqipëri të ketë akses të shërbimeve shëndetësore dhe pavarësisht se çfarë backgraundi ekonomikë kanë ata”.
“Një nga projektet e rëndësishme të Bankës Botërore është edhe projekti i shëndetësisë në Shqipëri dhe BB ka kontribuar shumë për këtë projekt , suksesi i çdo projekti janë njerëzit që janë pas këtij projekti”, tha Sayed.
Ministri Beqaj duke folur për nisjen e këtij projekti të rëndësishëm, tha se janë rreth 32 milionë euro të cilat do të ndihmojnë për përmirësimin e sistemit shëndetësor në Shqipëri.
“Projekti bazohet në disa objektiva konkretë. 8 milionë euro parashikohen të shpenzohen për fuqizmin e shërbimit mjekësor në pediatri. Me këtë financim për pediatrinë vetëm në QSUT do të ketë përmirësime të disa shërbimeve kryesore”, nënvizoi Beqaj.
Ministri Beqaj lidhur me furnzimin me ujë të spitaleve pas ndërprerjeve të djeshme deklaroi se ka filluar furnizimi normal me ujë i spitalit. “Për fat të të mirë shtrëngesa e pjesshme e furnizimit dje nuk solli asnjë pasojë për askënd dhe ajo që ishte më i rëndësishëm shërbimi i dializës u krye me sukses”, u shpreh ai.
ATSH
