Ditën e djeshme, në Gjykatën e Krimeve të Rënda u zhvillua seanca për grupin “Lazarati II”, i cili akuzohet për vrasjen e efektivit të RENEA-s, Ibrahim Basha, gjatë operacionit antikanabis në fshat në vitin 2015.
Në këtë seancë, ku ishin të pranishëm të gjithë të pandehurit, ka folur njëri prej tyre, i cili kishte marrë më parë statusin e bashkëpunëtorit të drejtësisë. Bëhet fjalë për shtetasin Elson Kazma, dëshmia e të cilit në Prokurori ka çuar në prangosjen e kryesuesve të grupit, Arbion dhe Alban Alikon.
Kazma ka thënë para trupit gjykues se ai e tërheq dëshminë që ka dhënë në Prokurori, si pjesëtar i grupit të zjarrit. Ai madje ka hedhur akuza të forta ndaj prokurorit Anton Martini, duke thënë se ky i fundit ka falsifikuar dëshminë e tij dhe se është dhunuar, si gjatë shoqërimit, ashtu edhe në Komisariatin e Policisë së Gjirokastrës.
Kazma ka mohuar të ketë takuar Alban dhe Arbion Alikon ditën kur u vra efektivi Basha, duke shtuar se nuk ka dalë nga shtë- pia atë natë. Ai ka kërkuar rrë- zimin e dëshmisë para prokurorit Martini. Pasi u lexua edhe dëshmia që pretendohet se është firmosur pa dijeninë e tij, Gjykata vendosi ta rrëzojë kërkesën e mbrojtjes.
DËSHMIA NË GJYQ
“Nuk e pranoj akuzën. Në momentin kur ka ndodhur ngjarja, kam qenë në shtëpi dhe vrasjen e kam mësuar nga televizori. U largova nga fshati pasi më lajmëruan se të gjithë djemtë po i arrestonin dhe u dhunonin në Polici”, kështu e ka nisur dëshminë e tij në gjyq Elson Kazma.
Ai ka shtuar se është dorëzuar vetë në Polici disa ditë më pas, por është dhunuar, kërcënuar dhe shantazhuar për të firmosur një dëshmi që nuk e ka dhënë kurrë.
“Ditën që u dorëzova, më merr vëllai në telefon dhe më thotë që kanë arrestuar babanë dhe që nuk do ta lironin nëse unë nuk do të dorëzohesha. Kështu që i thashë kunatit të më çonte në Komisariat. Rrugës na ndaloi policia dhe më pyetën për emrin, ua thashë, më morën kartën e identitetit dhe më nxorën me forcë nga makina. U thashë se do të vij vetë se prandaj jam nisur për t’u dorëzuar. Ata më futën në makinë dhe aty ishin 4 veta që më kërcënuan dhe dhunuan. Më thanë se duhet të pranoja që e kisha vrarë unë bashkë me të tjerët. Arbion dhe Alban Alikon kisha 1 vit pa i parë, ndërsa të tjerët i kam njohur vetëm në komisariat. Duhet t’i pranoja këto gjëra, ose kërcënohej jeta e familjes sime. Aty kanë qenë disa policë dhe prokurorët më kanë rrahur dhe më kanë bërë presion.
Më kanë goditur në pjesët e trupit dhe jo në fytyrë. Më rrahën dhe më detyruan të them një deklaratë të pavërtetë. Prokurori Anton Martini më tha se së bashku me atë personin tjetër do të pranoni vrasjen. Proka e ka pranuar tashmë dhe të dy do të thoni që jeni penduar.
Avokati që kam pasur më parë më dha që të firmosja një letër, kur e mora që ta lexoja, më tha s’ka gjë s’ke pse e lexon, kam folur me vëllain tënd dhe kemi bërë një marrëveshje. Kur kam pyetur vëllain, më tha që nuk kishte folur me të dhe se nuk e dinte që e kam firmosur këtë letrën”, ka thënë ai. /panorama
ma.me
