Bamir Topi te “Dola te Ola” këtë të diel foli ndër të tjera edhe për marrëdhënien e tij me Sali Berishën.
Në fotografinë që u shfaq në studio, mes kolegëve të tjerë ishte edhe kryeministri i asaj kohe Aleksandër Meksi, për të cilin Bamiri tha se ka qenë me fat që ka punuar me të, duke e cilësuar një njeri të mirë, korrekt, qytetar, tolerant, dhe profesionist, “Ruaj kujtime dhe konsideratë të lartë”.
Ndërkohë që për marrëdhënien me Sali Berishën ai tha se kompetencat e presidentit ishin shumë të mëdha dhe komunikimi i tyre ishte më i pakët dhe zyrtar.
Teksa u shfaqën edhe fotografi të tjera me Berishën, Topi zbuloi se marrëdhënia e tyre tanimë është inekzistente, dhe se data që i ka ndarë rrugët e tyre është 21 janari 2011.
“Edhe marrëdhëniet zyrtare kanë qenë të kontrolluara, për shkak të përplasjes së fortë”, tha ai, duke u shprehur se asnjëherë nuk e kishte menduar që në politikë për shkak të një ngjarje gjërat mund të ndaheshin në atë mënyrë.
Bamiri tha se data 21 janar nuk ka një protagonist por disa, “Ishin ata që e ideuan, ata që e organizuan, ata që reaguan, dhe paradoksi më i madh ishte se ata që nuk ishin fare pjesë e këtyre grupeve u sulmuan”, tha ai, teksa shtoi se “Sado që është politikë, disa gjëra thyhen për mos t’u ngjitur më”.
Ish-presidenti Bamir Topi ka shkruar një libër ku sqaron me detaje edhe ngjarjen e 21 janarit, bëhet fjalë për librin “Nocturn”.
/a.r
