Këto janë pamjet që vijnë mëngjesin e sotëm nga qarku i Gjirokastrës, ku përmbytjet e ditës së djeshme kanë shkaktuar dëme të konsiderueshme.
Banesa të mbuluara nga balta, biznese të mbushura me inerte, kanë sjellë pamje që për qytetin e Gjirokastrës nuk janë parë shpesh.
Gazetarja e Klan News Dorina Muhaj, tha më herët në një lidhje të drejtpërdrejtë se: “Gjirokastra është një qytet ku rrallë ndodhin situata të tilla. Nuk është parë që të ketë dëme kaq të mëdha në biznese dhe inertet të hyjnë brenda objekteve.”
Pavarësisht problematikave që vijojnë, me pushimin e reshjeve situata duket e përmirësuar ndjeshëm në këtë qak.
Aksi rrugor Gjirokastër–Kakavijë, i cili dje ishte i bllokuar në fshatin Kërdhoq përballë Lazaratit, aktualisht është i kalueshëm për automjetet. Megjithatë, në Gjirokastër e Vjetër ende ka prezencë të ujit, ndërsa fiderat Kardhiq, Lunxheri dhe Lazarat mbeten të stakuara. Punonjësit po vijojnë ndërhyrjet për normalizimin e furnizimit me energji elektrike.
Furnizimi me energji në qytet ka filluar të rikthehet gradualisht, ndërsa në Nënstacionin e Gjirokastrës e Vjetër po presin uljen e nivelit të ujit për të rihapur linjat e energjisë.
