Zv/kryeministrja dhe ministrja e Infrastrukturës dhe Energjisë, Belinda Balluku, inspektoi punimet në aksin Qukës-Qafë Plloçë. Ajo u shpreh se kjo do të jetë një rrugë e kategorisë C1 dhe sipas afateve parashikohet të dorëzohet në muajin Mars të vitit 2025.
“Për të gjitha këto ne do të shpallim afatet kontraktuale. Për segmentin e parë dhe segmentin e dytë Dhjetor 2024, ndërkohë për këtë segment ku po shkelim sot është Mars 2025. Sigurisht vlerësojmë shumë nga ana e ministrisë dhe qeverisë në rast se ARRSH dhe kompanitë që kanë kantieret do ia dalin t’i dorëzojnë më shpejt këto vepra”, tha ministrja.
Sipas saj, kostot e fshehura të kësaj rruge dolën më shumë se kostot e projektit të projektuar në fillim. Megjithatë u shpreh se gjithçka po ecën siç duhet dhe tashmë nuk ka pengesa financiare pasi problematikat janë adresuar dhe zgjidhur.
“Të tre kantieret po ecin siç duhet. Fakti që është zgjidhur, ka kaluar të gjitha etapat. Nuk kemi pengesë financiare. Gjeologjia do vijojë të jetë sfiduese pasi duket edhe vetë gjatë punës në kantier. Fakti që në dy lotet e tjera kemi ecur me hapa të qëndrueshëm, tregon që problematikat arrijnë të mitigohen”, u shpreh zv/kryeministrja.
Rruga Qukës-Qafë Plloçë do të ketë 6 ura të mëdha si dhe 2 tunele të mesme njëri 800 e tjetri 600 metra.
/f.s
