Qarqet e sigurisë në Gjermani janë të alarmuara. Sipas gazetës “Welt am Sonntag”, Shteti Islamik i ISIS, po i afrohet gjithnjë e më shumë Europës Perëndimore si kërcënim serioz.
Gjithnjë e më tepër si portë për të hyrë luftëtarët islamikë në Europën Perëndimore po përdoret Ballkani.
Gazeta shkruan se për këtë çështje të ndjeshme do të diskutojnë në Samitin e shteteve më të mëdha edhe kancelarja gjermane Angela Merkel dhe presidenti amerikan Barack Obama.
Samiti mbahet në kështjellën gjermane Elmau në landin e Bavarisë.
“Prej disa muajsh shërbimet sekrete gjermane vërejnë një trend në Ballkanin Perëndimor: islamistë radikalë atje po krijojnë gjithnjë e më shumë rrjete për t’i futur luftëtarët e xhihadit në zona krize. Në Kosovë, Bosnjë-Hercegovinë, Shqipëri dhe Maqedoni predikuesit selafistë në masë të madhe po rekrutojnë luftëtarë për përleshjet në Siri dhe në Irakun verior. Vetëm nga Kosova ndërkohë thuhet se kanë shkuar në rajonin e krizës, Siri dhe Irak, më shumë se 250 islamistë. Krahasuar me numrin e banorëve Kosova mban rekordin në Europë”, shkruan Welt am Sonntag.
