Pas mbledhjes me grupin e PS-së, Taulant Balla, foli për objektivat e kësaj force politike sa i takon procesit të anëtarësimit në Bashkimin Europian.
Mirëpo, u ndal edhe te çështja e “21 janarit”, e cila 15 vite më vonë, ende nuk është mbyllur nga organet e drejtësisë.
“Të mërkurën e ardhshme na bëhen 15 vite nga tragjedia dhe krimi shtetëror i 21 janarit. Ndërsa presim nga drejtësia, veçanërisht Prokuroria e Posaçme, zbatimin e vendimeve të Gjykatës Europiane të të Drejtave të Njeriut apo të Gjykatës së Lartë të Republikës së Shqipërisë, lidhur me plot aspekte të kësaj ngjarjeje kriminale…
Ne nuk kemi hyrë asnjëherë në përmbajtjen e dosjeve penale, por Kuvendi ka përgjegjësinë e kontrollit të zbatimit të vendimeve të Gjykatës Europiane bashkë me Ministrinë e Drejtësisë, siç na kujtonte dje një jurist i shkëlqyer 102-vjeçar, personalitet i fushës si Niazi Jaho”, deklaroi Balla.
Kujtojmë se më 12 mars 2024, pas kërkesës së familjarëve të viktimave, Gjykata e Lartë vendosi që dosja e “21 janarit” t’i kalonte SPAK-ut.
Për Gjykatën e Lartë, SPAK është institucioni që duhet të japë përgjigje nëse ka vend për hetime ndaj të kallëzuarve, ish-kryeministrit Sali Berisha, ish-ministrit të Brendshëm, Lulzim Basha, dhe ish-drejtuesve të lartë të Gardës.
Në 21 janar të vitit 2011, gjatë protestës që u zhvillua përpara Kryeministrisë humbën jetën Aleks Nika, Ziver Veizi, Faik Myrtaj dhe Hekuran Dedja, të cilët 10 vite më vonë u shpallën nga qeveria socialiste “Dëshmorë të Atdheut”.
