Kreu i Grupit Parlamentar Socialist, Taulant Balla, ka reaguar në lidhje me kërkesën e Presidentit të Republikës, Ilir Meta, për procedimin disiplinor të anëtares së Gjykatës Kushtetuese, Fjona Papajorgjit, me argumentin se ka kryer “shkelje të rënda profesionale dhe etike që diskreditojnë figurën e gjyqtarit kushtetues”.
Përmes një postimi në facebook, Balla deklaron se një kërkesë e tillë nga kreu i shtetit nuk është e mbështetur në kushtetutë dhe në ligj.
Sipas tij, Presidenti po cënon integritetin e Gjykatës Kushtetuese dhe vë në provë pavarësinë dhe paanshmërinë e Gjykatës Kushtetuese, duke krijuar artificë ligjore lidhur me zhvillimin e proceseve të ardhshme pranë këtij institucioni.
REAGIMI I PLOTË
Lidhur me njoftimin e sotëm mbi një kërkesë të Presidentit të Republikës së Shqipërisë për procedimin disiplinor të anëtarëve të Gjykatës Kushtetuese, vlerësoj se kërkesa e paraqitur nga ana e tij nuk është e mbështetur në Kushtetutë dhe në ligj.
Presidenti i Republikës duke u përpjekur të cenojë integritetin e Gjykatës Kushtetuese dhe të vendim-marrjes së saj, po vijon veprimet në kundërshtim me Kushtetutën dhe ligjet. Akte këto, të cilat sollën dhe shkarkimin e tij nga Kuvendi i Shqipërisë.
Është mëse qartë që vendimet e një procesi në Gjykatën Kushtetuese nuk mund të jenë në përputhje me “interesat” e një kërkuesi apo grupeve të cilat preken nga vendimi i Gjykatës Kushtetuese, por vetëm në përputhje me Kushtetutën e ligjin, ndaj “pala e pakënaqur” nuk duhet të ndërmarrë akte të cilat pengojnë dhe vënë në provë sistemin e garancive të pavarësisë dhe paanshmërisë së Gjykatës Kushtetuese të një vendi.
Nëpërmjet kësaj kërkese të pabazuar, Presidenti i Republikës, kërkon të krijojë artificë ligjore lidhur me zhvillimin e proceseve të ardhshme pranë Gjykatës Kushtetuese, për të penguar, apo bllokuar zhvillimin e tyre.
Reforma në Drejtësi ka krijuar dhe po vijon të krijojë “shqetësime” të vazhdueshme dhe për rrjedhojë do të shoqërohet me reagime apo presione me mjete joligjore, me të cilat organet e reja të sistemit të drejtësisë duhet të përballen.
Çdo zyrtar publik duhet t’i përmbahet me përpikmëri Kushtetutës dhe ligjeve, në mënyrë që të justifikojnë besimin e gjërë të publikut në Reformën e Sistemit të Drejtësisë.
/b.h
