Kreu i grupit parlamentar socialist Taulant Balla nuk e ka kursyer ironinë në lidhje me protestën e thirrur sot në orën 17:00 para parlamentit nga Sali Berisha. Në një deklaratë për mediat kreu i grupit socialist shprehet se nuk i kupton arsyet pse duhet protestuar para kuvendit.
“Shqipëria ka ca tradita. Pas dështimit të protestës revolucion të ditës së shtunë, në Shqipëri në këto raste bëhen edhe të tretat. Sot janë të tretat. Nuk di pse duhet protestuar para kuvendit meqë revolucioni ia doli të shtunën dhe rrëzoi regjimin, tani do të rrëzojmë edhe Raishtagun”.
Kreu i grupit parlamentar Taulant Balla u ka thënë deputetëve që të jenë prezent në parlament që në orën 16:30 për të mos patur përplasje me protestuesit, të cilët do të mblidhen në 17:00 para parlamentit.
Gjithashtu ai ka porositur deputetët që në rast bllokimi të foltores nga demokratët, socialistët do të largohen nga Parlamenti.
Balla e ka cilësuar qesharake kërkesën e grupit opozitar se kryeparlamentarja Lindita Nikolla ka kryer shkelje të rregullores dhe u shpreh se grupi socialist do të votojë kundër, pas konkluzioneve edhe të këshillit të legjislacionit.
“Kërkesë qesharake nga ana e deputetëve të opozitës se kryetarja e kuvendit ka kryer shkelje të rregullores dhe kushtetutës Këshilli i Legjislacionit ka bërë verifikimin e vet ku konkludohet se kryetarja e kuvendit ka respektuar gërmë për gërmë kushtetutën. Grupi i PS në mënyrë anonime do të votojë kundër kësaj kërkese”.
/a.r
