Deputeti Taulant Balla replikoi me ish-kryeministrin Sali Berisha, duke e quajtur si njeri që nuk rri dot pa hedhur baltë mbi këdo që mendon ndryshe. “Këtë e ke bërë, jo vetëm me kundërshtarët politikë, por edhe në PD. Je një gënjeshtar 71-vjeçar”, i tha Balla, i cili në fillim e ngacmoi duke i kujtuar mesazhin që i dërgoi disa javë më parë dhe Berisha e lexoi në Kuvend si denoncim nga një qytetar.
“Miqësisht, mos u merr me ato mesazhet se ato të gënjejnë. Ta kanë marrë dorën njerëzit, të çojnë mesazhe kot më kot”.
Balla e quajti protestën e sotme të opozitës si “funebër”, pasi aty munguan të rinjtë dhe erdhën të moshuar.
“Më funebër se protesta juaj sot nuk kishte. Thatë që do vinte rinia por erdhën të vjetër. Ishte një protestë pa kauzë, që ka për qëllim vetëm rikthimin e asaj kaste që një milion shqiptarë e larguan me votë”, tha Balla.
“Jeni larguar me votë zotëri, me një milion vota. Tentuat të bllokonit punimet e Kuvendit. Është normale që të mos e votosh buxhetin, siç nuk e kemi votuar edhe ne buxhetin tuaj dhe nuk po ua kërkojmë të votoni tonin. Por është kulmi që një forcë politike të rrethojë kuvendin për të mos lejuar votimin e buxhetit. Kjo është një mazhorancë e ardhur me votë dhe do të jenë përsëri të njëjtët qytatë do të tregojnë me votë nëse janë të kënaqur apo jo nga kjo qeveri.
Nuk mund të bëjhen zgjedhje të parakohshme sa herë që Basha ka frikë se humbet postin në SHQUP, kur kanë kaluar vetëm pesë muaj që kur shqiptarët votuan përsëri pro kësaj mazhorance.
Basha e Berisha flasin për revolucion nga njerëzit e pakënaquar. Po atëherë pse PD ka paguar njerëzit për të gjuajtur me gurë? Kur ka revoltë popullore, nuk paguhen njerëzit”.
Balla iu kundërpërgjigj edhe akuzave për korrupsion.
“Thoni që qeveria ëshë e korruptuar, por nuk mund ta vendosë dot tagrin e të korruptuarit Lulzim Basha, të cilin Prokuroria e ka gjetur fajtor për shpërdorimin e 230 milionë dollarëve në Rrugën e Kombit.
Nuk e vendos dot ti Sali se kush është i korruptuar, pasi për tetë vjet punove vetëm për të pasuruar familjen tënde. Keni ngritur një departament të tërë për shpifje, por nuk mund të quhen prova mesazhet që ti i nis Ristanit dhe Ristani ty. E gjitha kjo ndodh se patriarku ka kuptuar se ka dështuar me zgjedhjen e Bashës në krye të PD. Kjo është e vërtetë, Bashën nuk ta do më askush, as brenda partisë, as në publik.
Por Berisha e di që ky është dështim i Berishës, se po të ishte për Bashën nuk kishte fituar as zgjedhjet në parti dhe as bashkinë më 2009”.
