Kreu i grupit parlamentar të Partisë Socialiste, Taulant Balla, në seancën e sotme parlamentare iu përgjigj kërkesës së deputetit Gazment Bardhi për heqjen e imunitetit të ministres Belinda Balluku.
Balla i është kthyer Gazment Bardhit, ndërsa e ka akuzuar këtë të fundit se po gënjen. Ai tha se në Kuvend nuk ka kërkesë për heqjen e imunitetit, pasi nuk kanë imunitet ministrat dhe deputetët, por ka një kërkesë për dhënien e autorizimit për masë sigurie.
Balla theksoi se në Kuvend nuk ka asnjë kërkesë për heqje imuniteti, pasi sipas tij “as deputetët dhe as ministrat nuk kanë imunitet”.
Ai sqaroi se bëhet fjalë vetëm për një kërkesë për dhënie autorizimi për masë sigurie, ndërsa mbledhja e Këshillit të Mandateve është caktuar për datën 23 shkurt, ora 10:00.
Balla u ndal edhe te vendimi i Gjykatës Kushtetuese, duke theksuar se “ka një vendim 8 me 0, por pa jurisprudencë”, pasi gjykata nuk ka prodhuar një zgjidhje të qartë.
Ai shpjegoi se katër anëtarë të Kushtetueses kanë deklaruar se GJKKO ka ndërhyrë në kompetencat e kryeministrit, parlamentit dhe presidentit, ndërsa katër të tjerë kanë po të njëjtin qëndrim për ndërhyrjen, por mendojnë se zgjidhja duhet të vijë nga ligjvënësi kushtetues.
“Të gënjesh është edhe profesion dhe ju e ushtroni në mënyrë shembullore. Thatë që ka vendim 8 me 0, por nuk ka një vendim të tillë. Ka vetëm një lexim pa jurisprudencë. Ne do ta vijojmë nismën tonë për ndarjen e pushteteve, sepse është e papranueshme përpjekja e një pushteti për të pezulluar një pushtet tjetër”, u shpreh Balla.
Balla i kujtoi Bardhit, se zyrtari i lartë i BE nuk pranoi që të takonte Sali Berishën.
“Meqë më përmende një mik të vyer të Shqipërisë si David Mcallister. Një ndër gjerat që ai tha, është ajo që ua tha ju. Protestat e dhunshme janë të papranueshme për një demokraci funksionale. Thirrja ime ndaj jush dhe ndaj atij që nxit dhunën është e papranueshme për një parti që është anëtare e PPE. Të besoj që ai tha edhe diçka tjetër, nuk e takoi Sali Berishën. Këta nuk i takojnë as aleatet e vetë. Sa për akuza korrupsioni duhet të jemi të qartë, akuzë për korrupsion e keni aty mes jush, kryetarin tuaj. E mban mend ca bërtisje më 23 janar, Bordi i Paqes ta harrojë, Edi Rama nuk do të shkojë dot kurrë. Mbani telefonat ndezur, mbani televizorët ndezur në orën 16:00 Rama dhe Trump së bashku në mbledhjen e parë të Bordit të Paqes aty ku i takon Shqipërisë të jetë. Ju nuk ju erdhi Mcallister te partia, mirë që mori Jorida, Michael Gahler se do kishit mbetur bosh”, deklaroi Balla.
