Kreu i Grupit Parlamentar të PS përsëriti sot apelin e mazhorancës për përfshirjen e PD dhe LSI në diskutime për Kodin Zgjedhor.
Në përfundim të mbledhjes me deputetët, Taulant Balla tha se koha kur Kodi Zgjedhor bëhej me shpikje alla-shqiptare ka marrë fund.
Ai listoi edhe disa vende të Bashkimit Evropian që janë marrë si shembull për socialistët sa i përket formulës zgjedhore.
“Listat e hapura tashmë janë një fakt që nuk kthehet mbrapsht. Në zgjedhjet e 25 Prillit qytetarët do të kenë mundësinë të japin votën jo vetëm për partitë politike, por edhe për kandidatët. Ne kemi propozuar një draft që u bë publik nga Gjiknuri.
Ne e inkurajojmë Këshillin Politik ku ndodhen edhe subjektet jashtëparlamentare, me qëllim që të gjejnë gjuhën për përkthimin e ndryshimeve kushtetuese në Kodin Zgjedhor.
Për të mos humbur kohë, në Kuvend do të depozitohen ndryshimet e propozuara. Unë shpresoj që nga ana e opozitës joparlamentarë të vazhdojmë diskutimet. Por propozimet tona parashikojnë lista 100% të hapura. Koha kur ne bënim Kodin Zgjedhor me shpikje alla-shqiptare, siç ka qenë historia e koalicioneve deri në 30 korrik, ka ikur.
Propozimi ynë sot zbatohet në vende që kanë përafërsi me Shqipërinë. Pra Kroacia ka fiks këtë sistem. Austria, Belgjika, Holanda, Republika Cceke… Pra janë vende që i japin mundësi qytetarit të shprehen” – tha Taulant Bala.
/JavaNews/a.r
