Punimet e seancës së Kuvendit të enjten nisën me paraqitjen e raportit perfundimtar të komisionit hetimor për verifikimin e ligjshmërisë së privatizimit të Operatorit të Sistemit të Shpërndarjes së Energjisë, kompanisë çeke CEZ, nga kryetari Taulant Balla.
Balla tha se nga gjetjet e komisionit rezulton se privatizimi i OSSH-së ka qënë i paracaktuar nga qeveria “Berisha.
“Gara u hap publikisht më 13 maj 2008 ndërsa gjatë hetimeve të kryera, me prova dhe deshmi, është provuar, se ky proces ka filluar rreth fundit të vitit 2005 dhe fillimit të 2006-s. Pra, ai nuk nisi në 2008-n, por përgatitjet për të ishin bërë më herët”.
Komisioni administroi një e-mail të 7 shtatorit 2009, i nisur nga Nue Kalaj, ku thuhet pa ekuivok se ai kishte kontribuar katër vjet për të futur CEZ-n në sektorin energjitik shqiptar.
Me kërkesë të kryetarit të komisionit parlamentar të Ekonomisë, Erjon Braçe, në rendin e ditës së séances së sotme u përfshi dhe miratimi i pr/vendimit për zgjedhjen e Ervin Koçit në postin e kreut të Autoritetit të Mbikqyrjes Financiare, pas shkarkimit nga kjo detyrë, të Enkelejda Shehit.
Kuvendi diskuton sot tre pr/ligje të tjera të drejtësisë
Rendi i ditës i séances së sotme parashikon diskutimin e tre pr/ligjeve të tjera nga paketa prej 27 ligjesh, që mbështet riorganizimin e përgjithshëm që po i bëhet sistemit të drejtësisë në vend, ne zbatim të reformës kushtetuese.
Seanca e sotme ka në rend dite diskutimin e shtesave dhe ndryshimeve në ligjin “Për deklarimin dhe kontrollin e pasurive, të detyrimeve financiare të të zgjedhurve dhe të disa nënpunësve publikë”, ndryshimet në ligjin “Për masat kundër financimit të terrorizmit” si dhe ato në ligjin “Për parandalimin e pastrimit të parave dhe financimit të terrorizmit”.
Ndryshe nga 7 ligjet e para një jave, miratimi i të cilave kërkonte votim me shumicë të cilësuar, 84 vota, projektligjet e mësipërme miratohen me shumicë të thjeshtë.
ma.me
