Kryetari i Grupit Parlamentar të Partisë Socialiste, Taulant Balla, ka reaguar ndaj ish-Kryeministrit Sali Berisha, pas deklaratave të këtij të fundit se nuk kishte marrë asnjë fletëthirrje nga Prokuroria e Posaçme (SPAK) në lidhje me hetimet për ngjarjen e 21 Janarit 2011.
Në reagimin e tij në rrjetet sociale, Balla akuzoi Berishën për shmangie të drejtësisë, duke e cilësuar atë si “gënjeshtar, frikacak dhe i keq”.
Balla zbuloi detaje të refuzimit të fletëthirrjeve nga ish-Kryeministri:
“Drejtësia i paska çuar njoftimin tek shtëpia, ‘rojet janë autorizuar të mos marrin asnjë zarf’. Njoftimi i paska shkuar në dy vendet e punës – sekretaria e Grupit Parlamentar dhe ajo e Partisë – të cilat gjithashtu “refuzojnë të marrin njoftimin””, shkruan Balla.
“Çfarë turpi, për këtë dhe ata që e rrethojnë, të cilët për çdo rast tjetër mezi presin të tundin njoftimet e të tjerëve,” shkroi Balla, duke e akuzuar ish-Kryeministrin për hipokrizi.
21 Janari, “testi i së vërtetës”
Ngjarjet e 21 Janarit, ku u vranë katër protestues në Bulevardin “Dëshmorët e Kombit”, janë rihapur për hetim nga Prokuroria e Posaçme pas vendimit të Gjykatës Evropiane për të Drejtat e Njeriut (GJEDNJ).
Balla theksoi se ky hetim përbën “testin e së vërtetës” për drejtësinë shqiptare, duke nënvizuar se procesi do të jetë i pakthyeshëm.
“Koha kur urdhrat e Prokurorisë nuk zbatoheshin ka përfunduar përgjithmonë. Ajo kohë ka perënduar bashkë me vdekjen politike të katranit me bojë,” përfundoi Balla, duke i bërë thirrje institucioneve të ndjekin me rigorozitet çështjen.
