Deputeti socialist Taulant Balla i cilëson të pavërteta akuzat e kryetarit të PD-së Lulzim Basha, se qeveria po pengon Byronë Kombëtare të Hetimit.
Sipas Ballës, Byroja e Hetimit është pjesë e rëndësishme e reformës në drejtësi, e cila tashmë është në rrugën e duhur. Deputeti socialist tha se për të përmbyllur reformën në drejtësi, priten rekomandimet përfundimtare të Komisionit të Venecias.
Një ditë më parë, kreu i PD-së, Lulzim Basha përsëriti thirrjen për votimin e ligjit të Byrosë Kombëtare të Hetimit. Ai u shpreh se të gjitha partitë politike kanë rënë dakord për këtë draft final të Byrosë dhe duhet vetëm vullnet politik për ta votuar.
Sipas Bashës, qeverisë i mungon ky vullnet politik për të hetuar veten. Basha tha se opozita është e gatshme të votojë në parlament draftin e propozuar edhe nga ekspertët e SHBA-ve, që Byroja e Hetimit të jetë një Task-Forcë e përhershme në varësi të prokurorisë për të hetuar rastet e korrupsionit të zyrtarëve të lartë.
