Sot ka qenë seanca e parë e gjyqësorë për ish-deputetin Ervin Salianjin, për çështjen Babale.
Në një deklaratë për mediat Salianji tha se datat e shortit janë falsifikuar dhe se po tentohet që të hiqet vëmendja nga çështjet aktuale.
Ai tha se Rama i përdor prokurorët për t’u marrë me qytetarët që denoncojnë dhe për të mbyllur çështjet kriminale, ndërsa shtoi se tashmë do ta ndjekë çështjen vetëm përmes avokatëve.
Salianji tha se vëmendja e tij sot është vetëm tek protesta që do të mbahet në orë 18:30.
“Atëherë sot siç e dini është seanca e parë gjyqësore për çështjen Xhafa siç quhet Babalja. Jam sot këtu në respekt ndaj jush dhe qytetarët, sepse shumë I kam respektuar institucionet kur ka qenë puna për denoncimet e krimit dhe të përfshirjes së tij në nivelet më të larta të qeverisjes.
Pa diskutim që Edi Rama dhe qeveria e tij ka disa njerëz që i paguan nga taksat e qytetarëve, që për fat të keq janë prokurorët, të cilët duan ta zhvendosin apo ta mbajnë vëmendjen tek opozita apo tek varrosja e çështjeve të renda të korrupsionit dhe lidhjet e qeverisë me krimin.
Qytetarët janë lodhur nga një drejtësi që nuk bën drejtësi por bën padrejtësi dhe është varrmirrëse e çështjeve më të rënda.
Pa diskutim, ashtu siç Rama ka disa njerëz që i paguan nga taksat e qytetarëve për t’i përdorur kundër atyre që I denoncojnë, tani më edhe unë do ta ndjek çështjen nëpërmjet avokatëve, dhe do të vij kur të pranohet dëshmia e Ramës, Ballës, Xhafës dhe të gjithë personave të tjerë të përfshirë në këtë çështje.
Do bëj kallëzim për drejtuesit e policisë, të gjitha atyre që janë të përfshirë në këtë çështje.
Qytetarët kërkojnë punësim dhe përballen me agresion. Sot në orën 6 e gjysmë i bëj thirrje qytetarëve që të bashkohen me ne dhe të ndryshojnë sistemin.”, u shpreh ai.
g.kosovari
