Ish-deputeti demokrat, Ervin Salianji, zhvilloi sot seancën gjyqësore të radhës për çështjen “Babale”, për të cilën Prokuroria ka kërkuar dënimin e tij me 1.6 vite burg.
Avokati i ish-deputetit, Ledio Braho, kërkoi që Salianji të shpallet i pafajshëm, ndërsa vetë ish-deputeti kërkoi rishikimin e provave, që sipas tij, janë shmangur nga Prokuroria për t’i dhënë tjetër rrjedhë hetimit.
“Të rishihen provat që janë shmangur nga prokuroria për t’i dhënë një tjetër rrjedhë hetimit. Audioregjistrimi është i vërtetë. Prokuroria është nisur nga premisa që kam bërë unë lidhjen mes Olldashit dhe Veliut, por tabulatet provojnë që më ka vënë Olldashi në kontakt me Veliun.
Prokuroria i referohet në mënyrë të qëllimtë vetëm dëshmisë së Alizotit, duke mos marrë parasysh komunikimet e Alizotit me zyrtarë të lartë të policisë. Në këto përgjime del qartë që po paguhej për dëshmi të rreme”, theksoi Salianji.
