Marrja e presidencës së radhës së Bashkimit Evropian nga Sllovakia ishte në fokus të një konference për shtyp të organizuar të enjten në ambientet e ambasadës sllovake në Tiranë.
Në këtë ceremoni u pasqyrua axhenda e presidencës sllovake të BE-së, ndërsa ambasadorja e Bashkimit Europian, Romana Vlahutin theksoi se sfidat bëjnë thirrje për më shumë dialog.
Ambasadori i Sllovakisë në Shqipëri, Milan Ciganík theksoi se BE-ja do të mbështesë projektet në fushën e ekonomisë, ndërsa prioritet mbetet çështja e emigrantëve. Sipas tij, “BE promovon paqen dhe stabilitetin mes vendeve ndërsa politika e zgjerimit mbetet instrument jetik”.
Pas marrjes së presidencës sllovake, një nga veprimet e para do të jetë mbajtja e një samiti joformal liderësh të BE-së në kryeqytetin sllovak më 16 shtator, duke shënuar kështu herën e parë që një samit i tillë nuk do të mbahet në Bruksel prej vitit 2010.
Sllovakia ka marrë presidencën e radhës të Bashkimit Evropian, në momentin më të ndjeshëm në historinë e bllokut të shteteve evropiane, pas referendumit britanik për të dalë nga BE-ja. Ndonëse çështja e BREXIT do ta dominojë këtë periudhë, Bratislava është zotuar se do të merret edhe me forcimin e ekonomisë së BE-së dhe me çështje të tjera urgjente./a.m.
