Sa më shumë që reagon Avokati i Popullit dhe funksionarët shqiptarë në pushtet, aq më tepër shtohet tortura e policisë ndaj pjesëtarëve të Grupit të Kumanovës. Me këtë krijohet përshtypje se prej Avokatit të Popullit dhe pushtetarëve shqiptarë pjesëtarët e Grupit të Kumanovës kanë vetëm probleme e kurrfarë dobie, shkruan gazeta “Lajm” e Maqedonisë.
Avokatja Artene Iseni, një nga mbrojtësit e të akuzuarve në “Rastin Kumanova”, për “Lajm” ka përshkruar keqtrajtimet e fundit që kanë përjetuar dy nga të akuzuarit.
“Herën e fundit i kanë zhveshur tërësisht Genc Sefën dhe shtetasin gjerman Enver Klajn dhe më pas i ka rrahur. Ua kanë shkelur këmbët, i kanë goditur te brinjët dhe ua kanë goditur kokën për muri. I kanë nënçmuar, duke ua futur gishtat në gojë, me pretekst se po kërkojnë mos kanë ndonjë letër nën gjuhë”, thotë avokatja Iseni, duke sqaruar mënyrat se si po torturohen pjesëtarët e Grupit të Kumanovës.
Ajo thotë se ka shkruar dhjetëra letra zyrtare që ua ka dërguar të gjitha institucioneve kompetente, por tani për tani nuk ka kurrfarë efekti. (b.an)
