Pas 15 vitesh që emri i Shkëlzen Berishës përmendet si i përfshirë në tragjedinë e Gerdecit ai dëshmoi sot për herë të parë në Gjykatë duke thënë se nuk ka asnjë lidhje me ngjarjen e sipas tij GJKKO e paska thirrur kot,
Në studio Live në Report Tv me gazetarin Arbër Hitaj të ftuar ishin avokati Idajet Beriri, avokati në lidhje skype Arbër Hoxha dhe Azgan Haklaj, anëtar i Kryesisë së PD të cilët dhanë argumentet e tyre mbi dosjen Gërdeci dhe qëndrimet e Shkëlzen Berishës.
Për Idajet Beqirin personi kryesor i implikuar në dosjen Gërdeci është Shkëlzen Berisha ndërsa rrugën ia shtroi i ati Sali Berisha.
“Shkëlzeni njeriu kryesor i implikuar ne krimin e Gërdecit. Babai i tij kryeministër i shtroi rrugën. Faksi doli nga ministria e Drejtësisë për Shkëlzenin, ishte firma për vendimin e qeverisë aty ku do të bëhej Gërdeci që vrau shqiptarët. Fatmir Mediu sido që të thotë ka përgjegjësi të drejtpërdrejtë. Mediu duhet ta dijë që s’mund ta mbulojë Shkëlzenin.
Shkëlzeni ndërpreu punën në fabrikën e Gërdecit kur erdhi George Bush. Sali Berisha është njëshi, Shkëlzeni dyshi, Aldo Bumçi dhe Fatmir Mediu kanë vrarë 26 njerëz. Jetët e atyre njerëzve duan shpagim dhe shpagimi është burgimi i përjetshëm”, tha ai.
Avokati Arbër Hoxha përgënjeshtroi Shkëlzen Berishën pasi ky i fundit deklaroi se ishte thirrur kot nga GJKKO. Hoxha tha se gjykata thërret një person në cilësinë e dëshmitarit qe ka dijeni për veprën penale.
“GJKKO nuk e ka thirrur kot. Është person që ka dijeni për veprën penale për të cilën po hetohet”, shtoi ai./m.j
