Zbardhen përgjimet e oficerit të Policisë së Vlorës, Vladimir Zanaj, i arrestuar si pjesë e një grupi kriminal të përfshirë në kultivimin e hashashit në fshatrat e Vlorës e më pas trafikimin e saj me avion drejt Italisë.
Sipas Prokurorisë për Krimet e Rënda, shefi Personelit në Policinë e Vlorës mbante kontakte telefonike me të dyshuarit si trafikantë, duke i informuar ata në lidhje me lëvizjet e Policisë.
Komunikimet telefonike mes njëri-tjetrit dhe përmbajtja e tyre ka ngritur dyshime të arsyeshme për Prokurorinë se të arrestuarit ishin pjesë e një linje trafiku të narkotikëve, raporton “Panorama”
Kështu, më 19 gusht i dyshuari Fatos Burhamaj i ka rrëfyer Sokol Burhamajt (Lamajt) se Policia kishte mbërritur te parcelat e kanabisit. Në një tjetër bisedë, ky i fundit lajmëron policin Zanaj dhe i kërkon ndërhyrje. Ndërsa biseda të zhvilluara më 23 gusht hedhin dritë mbi përgatitjet për trafikun e 120 kilogramëve kanabis drejt Italisë përmes një avioni super të lehtë.
Nga operacioni policor “Fluturimi i lirë” i zhvilluar në Itali dhe Shqipëri, i finalizuar mëngjesin e 24 gushtit 2015, në vendin tonë u arrestuan Neko Burhamaj, Fatos Burhamaj, Fadil Shahaj, Igli Shahaj, Fadil Shahaj, Sokol Lamaj (Burhamaj) dhe Vladimir Zanaj, me detyrë shef Personeli në DPQ, Vlorë.
