Avioni amfib AG600 Kunlong i zhvilluar në Kinë përfundoi stërvitjen e tij të parë në ujë, njoftoi të enjten Korporata e Industrisë së Aviacionit të Kinës (AVIC).
Pasi fluturoi rreth 190 km, avioni amfib kreu stërvitjen mbi liqenin Songhua në provincën Jilin të Kinës Verilindore, duke mbledhur dhe hedhur ujë në kushte natyrore, për të vënë në provë çdo sistem AG600, shkruan “Xinhua”.
Më parë, stërvitje të tilla ishin të kufizuara në një bazë fluturimi provë në qytetin qendror kinez të Jingmen në provincën Hubei.
Pasi mbush një ngarkesë prej 12 tonësh me ujë në bazën e tij, avioni mund të nxjerrë edhe nëntë mbushje të tjera nga një liqen, duke i mundësuar atij të hedhë gjithsej 120 tonë ujë, të mjaftueshme për të zhytur një sipërfaqe prej më shumë se 4 hektarësh me intensitet të shirave të rrëmbyeshëm gjatë misioneve të shuarjes së zjarreve, sipas AVIC.
AG600 ka hyrë zyrtarisht në prodhim masiv pasi mori certifikimin e prodhimit në qershor. Tre AG600-at e parë kanë përfunduar fluturimet e tyre të pranimit dhe do t’u dorëzohen operatorëve deri në fund të vitit 2025.
