Serbia do të nisë vitin tjetër ndërtimin e autostradës nga Nishi në drejtim të Merdarës, për t’u lidhur më pas me autostradën në drejtim të Shqipërisë.
Ministri i Financave në Qeverinë teknike të Serbisë, Dushan Vujoviq, ka deklaruar se kjo është një mundësi jo vetëm për zhvillimin e zonave që preken nga ndërtimi i autostradës, por edhe për daljen e Serbisë në Adriatik nëpërmjet portit të Durrësit.
“Pritet që kjo rrugë të ndërtohet në dy faza. Faza e parë është ajo e ndërtimit të të ashtuquajturit gjysmë-profil dhe më pas profili i plotë që është shtylla kurrizore e zhvillimit dhe lidhja alternative me Adriatikun”, citon KP ministrin serb.
Ai tha se ky projekt nuk është i njëjtë si projektet prioritare të korridoreve 10 dhe 11, të cilat tashmë janë zbatuar.
“Një nga këto përparësi shtesë është për t’u lidhur direkt nga Nishi, mbi rajonin e Serbisë jugperëndimore me Tiranën dhe Durrësin. Kjo është një mënyrë tjetër, e cila ngrihet mbi infrastrukturën ekzistuese shtylla kurrizore dhe lidh rajonet që janë me rëndësi të madhe, që aktualisht nuk janë shumë të zhvilluara.
Ato kanë domethënie të madhe për Serbinë dhe të gjitha vendet e tjera në rajon. Këtë herë në një farë mënyre zgjidh disa probleme me një gur “, tha Vujoviq për mediat serbe.
Projekti është miratuar nga Bashkimi Evropian dhe pritet të financohet po prej tij. BE-ja do të sigurojë rreth 150 milionë euro për infrastrukturën dhe energjinë në Ballkanin Perëndimor, përfshirë edhe ndërtimin e rrugës nga Nishi në Prishtinë, citohet Koha. (b.an)
