Një ngjarje e rëndë ka ndodhur në mesnatë në Gjirokastër. Një automjet i OSHEE është rrëzuar në lumin Drino përballë fshatit Lazarat, si pasojë kanë humbur jetën 2 elektriçistët, Selfo Kallfa dhe Ismet Isaraj.
Dy punonjësit e OSHEE në rajonin Gjirokastër ishin duke inspektuar zonën lindore të luginës pasi kishte avari në linjat e përcjelljes së rrymës elektrike. Pasi makina është rrëzuar në lum, dy elektriçistët nuk kanë mundur dot të dalin, ndërsa vijon puna për nxjerrjen e trupave.
Avaria është konstatuar në fshatin “Asim Zenel”, ku kanë shkuar për të ndërhyrë dy elektriçistët. Si pasojë e terrenit të keq dhe errësirës, makina me të cilin lëviznin dy punonjësit e OSHEE, ka rënë në kontakt me një rrugë të deformuar pranë bregut të lumit dhe e kanë pasur të pamundur për të manovruar makinën.
Ky i fundit ka rënë në rrjedhën e lumit në thellësi, ndërkohë që dy elektriçistët nuk kanë mundur dot të dalin. Menjëherë në vendngjarje ka shkuar policia e Gjirokastrës së bashku me PMNZSH për të ndërhyrë. Mirëpo për shkak të thellësisë dhe motit të acartë, autoritetet vendore policore kanë kërkuar nga kryeqyteti polumbarë për të nxjerrë automjetin.
Situata po monitorohet deri në nxjerrjen nga thellësia të trupave dhe automjetit të OSHEE nga kryebashkiaku i Gjirokastrës Flamur Golemi, prefekti Odise Kote dhe drejtori i Policisë së Gjirokastrës Fatmir Hoxha.
g.kosovari
