Përmes portalit të saj Transparenca.al qeveria shqiptare ka reaguar në lidhje me lajmin e publikuar në media se Garda e Republikës do të kryejë një tender për makina si dhe për akuzën e bërë nga PD në lidhje me këtë lajm, se mazhoranca është e korruptuar.
Në njoftim, qeveria sqaron se Garda nuk ka shpallur asnjë tender për të blerë makina për ministrat dhe se automjetet për të cilat ajo akuzohet nga ana e PD, në fakt janë makina që do të merren me qera dhe nuk do të blihen. Në njoftimin e saj qeveria sqaron se marja me qira e makinave do të bëjë të mundur rifreskimin e flotës aktuale të automjeteve që janë bërë shumë të kushtueshme për tu mbajtur si dhe do të kursejë shuma të mëdha parash.
“Por çka është më e rëndësishme është analiza financiare, që tregon se marrja me qira (leasing) e automjeteve që do të kryejnë transportin e Kabinetit Qeveritar është version më i lirë jo vetëm se blerja e automjeteve të reja, por edhe se mbajtja në përdorim e flotës ekzistuese.
Marrja me qira (leasing) e një numri të njëjtë makinash, kushton 494,520 Euro në vit, ose 1,978,080 Euro për një periudhe katër vjeçare. Shteti shqiptar kursen 141,872 Euro në vit, ose 567,491 Euro për një periudhë katër vjeçare dhe në të njëjtën kohë automjetet në dispozicion janë të reja, më të sigurta, ndotin më pak mjedisin dhe duke pasur një efiçencë më të lartë në konsum, kursejnë rreth 30% më shumë edhe në kostot e karburantit.
Kosto e marrjes me qira (leasing) të 22 automjeteve është akoma më e ulët nëse krahasohet me koston e blerjes së 22 automjeteve të reja. Shtetit shqiptar do t’i kushtonte plotë 3,497,142 Euro blerja dhe mirëmbajtja për një periudhë katër vjeçare e 22 automjeteve të nevojshme për Kabinetin Qeveritar. Dukshëm, përmes marrjes me qira (leasing), kursehen plotë 379,765 Euro në vit, ose 1,519,062 Euro për një periudhë katër vjeçare.”
