Qeveritë po dështojnë në përgatitjen e punëtorëve të tyre për ndikimin e inteligjencës artificiale teksa po përballen me “procesin e shkatërrimit krijues”, i cili në mënyrë radikale do të ndryshojë profesionet dhe karrierat e njerëzve, sipas një raporti të Organizatës për Bashkëpunim dhe Zhvillim Ekonomik (The Organisation for Economic Co-operation and Development) OECD –së. Klubi i 36 kombeve tha se pjesëmarrja në trajnime është më e ulëta, pikërisht tek ata që kanë më shumë nevojë: të pak-kualifikuarit, punonjësit në moshë, ata që kanë humbur punët e tyre dhe ata që punojnë me kohë të pjesshme ose përkohësisht.
Qeveria duhet të bëjë më shumë për t’i ndihmuar njerëzit në punë (veçanërisht ata që janë pak të kualifikuar) të ritrajnohen për të parandaluar “zhvlerësimin dhe vjetërimin e aftësive, duke lehtësuar kështu kalimin nga puna në punë”, tha OECD-ja.
Ndërkohë, sipas një raporti, sistemet e sigurisë sociale janë vjetruar në shumë shtete. Punonjësit e përkohshëm vështirësohen që të kenë mundësi për përfitime që më së pari I marrin punonjësit tradicionalë, si: pagesë shëndeti, prindërore, mbrojtje nga shkarkimet e padrejta etj.
Reformat janë të domosdoshme pasi “ndërprerjet në tregun e punës mund të çojnë në pakënaqësi në rritje për efektshmërinë e sistemeve tona (politike)”, tha Angel Gurría, sekretari i përgjithshëm i OECD-së.
Sipas të dhënave të OECD-së, tre të katërtat e njerëzve duan që qeveria e tyre të bëjë më shumë për mbrojtjen e sigurisë së tyre ekonomike dhe sociale.
Po aq sa progresi teknologjik dhe automatizimi , tregjet e punës nëpër botën e industrializuar janë nën presion si rezultat i globalizimit dhe i ndryshimeve demografike.
Gjer më tani, prirja drejt automatizimit nuk ka çuar në struktura shpunësimi, madje nëpër vendet më të zhvilluara përqindjet e punësimit janë rritur.
Ndryshimet teknologjike po u japin njerëzve “më tepër liri për të vendosur se ku, kur dhe si të punojnë”, duke përmirësuar kështu drejtpeshën e jetës së punës dhe duke krijuar “mundësi të reja për grupe të papërfaqësura më parë për të marrë pjesë në tregun e punës”, tha OECD-ja.
Detyra të mërzitshme e të rrezikshme po automatizohen, jeta dhe siguria po përmirësohen, prodhueshmëria po rritet, ndërkohë që teknologji të reja po krijojnë mundësi të reja punësimi.
Por, sipas studimit, rreth 14% e punëve ekzistuese mund të zhduken si rezultat i automatizimit për rreth 15-20 vjet, ndërkohë që 32% e tyre do të ndryshojnë rrënjësisht.
Porositë për robotë industrialë u trefishuan dekadën e shkuar dhe gjer në vitin 2020 do të dyfishohen, ndërkohë që sasia e kapitalit privat të investuar në inteligjencën artificiale u dyfishua gjatë vitit të shkuar.
Një tjetër raport nga McKinsey tregon se thuajse çdo punonjës në një moment të caktuar gjatë në të ardhmen do t’i duhet të përballet me sfidën e ndryshimit teknologjik. “Ajo që ne kemi zbuluar është se çdo punësim ka një përqindje domethënëse të mundësisë për automatizim. Çdo punonjës duhet të mendojë se si puna e tij mund të ndryshojë”, thotë Michael Chui, partner në McKinsey dhe një nga autorët e raportit.
Disa profesione do të preken më shumë se disa të tjera. Kur u pyet nëse taksistët duhet të shqetësohen për makinat e së ardhmes pa shoferë z. Chui u përgjigj: “Ne shohim përparime të mëdha në teknologjinë autonome, por ato nuk funksionojnë mirë gjatë natës apo në shi dhe u duhet shumë kohë që të pozicionohen në një vend me shumë taksi. Një këndvështrim realist i teknologjisë është më i dobishëm”.
Analizat e forcës së punës në vendet e Eurozone-s të bëra nga McKinsey tregojnë se profesionet e pak-kualifikuara dhe të pak-paguara janë më tepër në rrezik për automatizim, bazuar në atë se cilat aktivitete mund të automatizohen, duke përdorur teknologjinë e deritanishme. Sipas studimit, shitjet me pakicë, shërbimet e mikpritjes e të ushqimit janë ato që do të preken më shumë.
/sipas Financial Times, përgatiti Erina Çoku/
