Këtë herë, janë australianët që kanë diçka për të thënë e për të sugjeruar për Shqipërinë. “Findinglala” është një blog interesant, i një vajze australiane, e cila është në kërkim të aventurave turistike.
Në një nga udhëtimet e saj në Europë, ajo ka gjetur Shqipërinë, një vend të vogël të Ballkanit me bregdet e male.
“Ky vend ka një histori të lashtë dhe vija bregdetare është ende e paeksploruar në tërësinë e saj dhe nuk është e ndikuar nga masat turistike, sikundër ndodh me Greqinë apo Kroacinë. Një nga pyetjet që më bëhej rëndom kur thoja se dëshiroja të vizitoja Shqipërinë ishte; Përse duhet të shkosh atje? A është vend i sigurt? Por, ja përse duhet ta vizitoni tani Shqipërinë”.
Mungojnë turmat e turistëve
Nëse doni që të vizitoni një vend europian, të mbushur me histori dhe pa u ndjekur nga turma turistësh, mund të vizitoni Shqipërinë. Është një ndjesi e veçantë që të vizitosh një pasuri botërore pa u ndjekur nga shumë njerëz.
Histori interesante
Shqipëria është një nga vendet europiane që ofron shumëllojshmëri në historinë e saj, nga lashtësia te komunizmi te ditët moderne.
Është shumë e lirë
Shqipëria është ndër vendet më të lira për t’u vizituar në Europë. Ende nuk është një vend i BE-së, ndaj dhe monedha është leku. Hotelet cilësore në afërsi të qendrës së kryeqytetit llogarisin akomodim në jo më shumë se 80 euro nata, por mund të gjeni edhe më lirë. Një vakt i mirë në një restorant të këndshëm mund të konsumohet edhe për 6 dollarë.
Është i bukur
Shqipëria ka pak nga të gjitha. Plazhe me rërë e diell, male të bukura dhe çdo gjë mes tyre. Nuk ka sesi mos ta duash në çdo aspekt. Ka kështjella, kisha, ndërtesa historike, lumenj e shumë gjëra të tjera.
E në fakt blogerja australiane rendit 10 arsye se përse duhet vizituar vendi i vogël i Ballkanit. /monitor/r.a
