Kryeministri i Australia, Anthony Albanese, i ka bërë të ditur Keir Starmer se qeveria e tij do të mbështesë planet për të hequr Prince Andrew (Andrew Mountbatten-Windsor) nga radha e trashëgimisë së fronit mbretëror. Albanese shprehu mbështetjen e tij në një letër drejtuar kryeministrit britanik.
Andrew, vëllai i Mbretit, mbetet i teti në radhën e trashëgimisë së fronit, pavarësisht se iu hoqën titujt, përfshirë ai “princ”, në tetor, mes presioneve lidhur me marrëdhëniet e tij me financierin pedofil Jeffrey Epstein.
Qeveria britanike po shqyrton paraqitjen e një projektligji për ta hequr atë nga radha e trashëgimisë. Kjo vjen pas arrestimit të Andrew të enjten, nën dyshimet për keqpërdorim të detyrës publike. Ai i ka mohuar vazhdimisht dhe me forcë të gjitha akuzat. Ish-princi u lirua nën hetim 11 orë pas arrestimit nga policia e Thames Valley.
Në letrën e Albaneses thuhet:
“I dashur Kryeministër Starmer, në dritën e zhvillimeve të fundit lidhur me Andrew Mountbatten-Windsor, po ju shkruaj për të konfirmuar se qeveria ime do të pajtohej me çdo propozim për ta hequr atë nga radha e trashëgimisë mbretërore.
Jam dakord me Madhërinë e Tij se ligji duhet të ndjekë rrugën e tij të plotë dhe se duhet të ketë një hetim të plotë, të drejtë dhe të rregullt. Këto janë akuza të rënda dhe australianët i marrin ato seriozisht”.
Duke folur pas arrestimit të vëllait të tij, Charles III deklaroi: “Tani do të ndiqet procesi i plotë, i drejtë dhe i rregullt përmes të cilit kjo çështje do të hetohet në mënyrën dhe nga autoritetet përkatëse.”
Heqja e tij nga radha e trashëgimisë do të kërkonte një akt të Parlamentit britanik. Ky do të duhej të miratohej nga deputetët dhe anëtarët e Dhomës së Lordëve, dhe do të hynte në fuqi pasi të merrte miratimin mbretëror nga Mbreti.
Gjithashtu do të nevojitej mbështetja e 14 vendeve të Komonuelthit ku Mbreti Charles është kreu i shtetit, përfshirë Australia.
Buckingham Palace nuk ka komentuar publikisht mbi planet e qeverisë për ta hequr Andrew nga radha e trashëgimisë.
Të premten, ministri britanik i Mbrojtjes, Luke Pollard, i tha BBC-së se ky veprim – që do ta pengonte Andrew të bëhej ndonjëherë mbret – ishte “gjëja e duhur për t’u bërë”, pavarësisht rezultatit të hetimit policor.
Ish-princi u arrestua në orën 08:00 GMT të enjten në Sandringham House, rezidenca e Mbretit në Norfolk, ku Andrew ka jetuar që nga largimi nga shtëpia e tij në Windsor, Royal Lodge, në fillim të shkurtit.
Kontrollet policore në Sandringham përfunduan vonë të enjten. Mësohet se ato vazhduan gjatë fundjavës në pronën me 30 dhoma në Windsor, ku të shtunën u panë disa makina policie pa shenja identifikuese.
