Në prag te nisjes se sezonit veror të plazheve, Agjencia Kombëtare e Bregdetit është e angazhuar qe të jape ndihmesën e saj në ato plazhe që kanë frekuencë të lartë pushuesish, por që njëkohësisht paraqesin edhe problematika përsa i përket pastërtisë dhe menaxhimit bashkëkohor.
Një nga plazhet më të vizitueshëm nga vendasit dhe të huajt në këtë periudhë është ai i Golemit.
Ky plazh ka qënë dhe vëmëndja kryesore e AKB-së këto ditë, duke kontaktuar edhe përfaqësues të pushtetit lokal, banore të zonës, tregtare dhe persona që ushtrojnë aktivitetin e tyre në këtë plazh.
I pyetur nga ATSH-ja, Drejtori i Përgjithshëm i AKB-së Auron Tare, tha se ”Është koha kur stafi ynë është në terren dhe në kontakt të përditshëm me administratoret e plazheve. Po bëjmë përpjekje për ngritjen e vend-rojeve për pushuesit në ato plazhe ku janë vërejtur problematika”. Sipas tij, plazhet po mbushen me pushues dhe gadishmëria për t’u shërbyer atyre duhet të jetë në rritje.
ATSH/d.i.
