Gjykata e Arbitrazhit Sportiv (CAS) konfirmoi dënimin për atletët rusë, të cilët ishin pezulluar nga Federata Ndërkombëtare pas raportit të dopingut. 68 atletë rusë nuk do të mund të marrin pjesë në Lojërat Olimpike ‘Rio 2016’, për shkak të pezullimit pas abuzimit me substanca të ndaluara.
Gjykata e Arbitrazhit Sportiv hodhi poshtë apelin e atletëve rusë. Ata kërkonin të merrnin pjesë në Lojërat Olimpike mbi bazën e principit të përgjegjësisë së drejtpërdrejtë, domethënë të pezullohen vetëm ata që kanë përdorur doping, jo të tjerët. Por ky vendim mund të ndikojë edhe te vendimi i Komitetit Ndërkombëtar Olimpik, mbi pezullimin e të gjithë sportistëve rusë nga Lojërat Olimpike.
Kjo bën që Rusia të mos ketë asnjë përfaqësues të atletikës në Lojërat Olimpike “Rio 2016”, përveç Yulia Stepanova e cila bashkëpunoi me WADA-n duke akuzuar “dopingun shtetëror”.
Të gjithë atletët e tjerë rusë, mes të cilëve edhe dy herë kampionia olimpike e kërcimit me shkop, Yelena Isinbayeva, nuk do të marrin pjesë në Rio. Isinbayeva pas publikimit të dënimit, deklaroi se ky ishte një vendim hapur politik.
ma.me
