Kamerat e një hoteli që ndodhet përballë shtëpisë së biznesmenit Gramoz Mema kanë filmuar të gjithë skenën e krimit. Nga informacionet e para mësohet se atentatorët kanë qenë katër persona. Me një makinë ata janë vendosur pranë shtëpisë së Memës, të cilin e kanë pritur me orë të tëra që të kthehej.
Sapo Mema është afruar, ka zbritur nga makina e tij, mjeti i atentatorëve ka ecur mbrapsht dhe është afruar pranë biznesmenit. Njëri prej tyre ka zbritur nga mjeti e ka qëlluar Memën në derën e shtëpisë dhe më pas është larguar. Biznesmeni është pikasur një orë më vonë pasi vrasja u krye me një pistoletë me silenciator duke mos shkaktuar zhurmë. Më pas autorët janë larguar në drejtim të paditur.
Deri më tani nuk është raportuar për ndonjë makinë të djegur, siç ndodh gjithmonë, por nuk përjashtohet mundësia që autorët ta kenë zhdukur në det apo dhe në Butrint.
Mema u dërgua në spital, por rrugës humbi jetën. Ai kishte një lokal në qendër të Ksamilit dhe ishte i përfshirë në lojërat e jashtëligjshme të fatit. Paraprakisht dyshohet se vrasja ka ardhur si pasojë e konflikteve në lidhje me ‘bizneset e errëta’ ku ishte përfshirë Mema. Nuk përjashtohet as pista e një konflikti të hershëm që mund të ketë pasur viktima për arsye të tjera.
Mësohet se viktima Gramoz Mema ka qenë prej disa vitesh emigrant në Angli. Ai ishte kthyer para dhjetë vitesh dhe jetonte me nënën, ndërsa ishte i pamartuar.
g.kosovari
