Policia e Vlorës po heton si një prej pistave të saj një lidhje të mundshme të atentatit të mbrëmshëm me masakrën e Çoles, ku mbetën tre të vrarë. Sipas të dhënave, viktima Erven Hyseni është i afërm i një prej të vrarëve të kësaj masakre, Haki Rakipi. Më konkretisht, mësohet se viktima Hyseni e kishte djalë daje të vrarin e kësaj masakre, që ndodhi dy vite më parë.
Por policia nuk përjashton as pista të tjera, përfshirë këtu konflikte apo larje hesapesh me persona të tjerë të viktimës Hyseni, i cili mendohet të ketë qenë edhe shënjestra e atentatit. Sipas burimeve të policisë, janë përqendruar më së shumti në pistën e një hakmarrjeje të mundshme për shkak të lidhjes së biznesmenit me viktimën e ngjarjes së rëndë të vitit 2015.
Masakra e Çoles ndodhi në prill të vitit 2015, kur pas një sherri që nisi në një kazino, mbetën të vrarë shtetasit Haki Rakipi, Albi Limaj dhe Ardi Velaj. Policia arrestoi si autorë të masakrës Aleksandër Llanaj, Ani Begajn dhe Bertil Aliajn.
Gjatë seancave të gjata, u dënua me burgim të përjetshëm Aleksandër Llanaj, ndërsa Ani Begaj dhe Bertil Aliaj u dënuan me nga 35 vjet burg në mungesë. Familjarët e viktimave kanë lëshuar sa herë akuza për padrejtësi në gjykim, e vetëm pak kohë më parë i dërguan letër me shqetësimin e tyre Presidentit Bujar Nishani.
Nga ana tjetër, hetimet e policisë nuk përjashtojnë faktin se në shënjestër mund të ketë qenë edhe drejtori i OSHEE-së, Roland Saliu, ngjarje e cila mund të ketë ardhur për shkak të detyrës së tij apo ndonjë konflikti tjetër personal.
Për nga mënyra e ekzekutimit, vendi dhe orari kur ndodhi ngjarja, si edhe fakti se dy viktimat e atentatit të ndodhur mbrëmjen e së enjtes në qytetin e Vlorës janë dy personazhe të njohur, ka shkaktuar panik te qytetarët e Vlorës.
Shenjestra
40-vjeçari Hyseni, i cili dyshohet se ishte shënjestra e sulmit me armë në qendër të qytetit, rezulton se është pronar i televizionit lokal në Vlorë të quajtur “Vlora Channel”.
Mësohet se Erven Hyseni, përveç medias, ishte një biznesmen i njohur në Vlorë. Atentati ndodhi pikërisht në një prej pronave të tij, në hotel “Vlora”.
Kreu i OSHEE
Ndërsa Roland Saliu, i cili dyshohet se është viktimë aksidentale e atentatit, mbante prej dy vitesh detyrën e drejtorit të OSHEE-së për Vlorën.
44-vjeçari mori këtë detyrë në nëntor të vitit 2015, pasi drejtori i asaj kohe, Anduel Tahiraj, dha dorëheqjen për shkak të angazhimit të tij politik si koordinator i PS-së për Vlorën në zgjedhjet lokale.
Saliu më parë ka mbajtur detyrën e kryeinxhinierit pranë strukturës së OSHEE-së në Vlorë.
Saliu rezulton se është arrestuar me urdhër të Prokurorisë në vitin 2008, kur punonte si inxhinier i Korporatës Energjetike Shqiptare në Fier, shkruan “Panorama”. 44-vjeçari u arrestua bashkë me dy persona të tjerë me akuzën e abuzimeve me investimet e kryera në zonën energjetike të Fierit. Bëhej fjalë për abuzime gjatë instalimit të matësve të rinj të energjisë, për një dëm të shkaktuar prej 400 mijë lekësh të rinj. Por gjatë hetimit të çështjes, ai u shpall i pafajshëm.
Kunati shpërthen në akuza
Biznesmeni u dërgua në spital nga kunati i tij i cili punonte operator të televizion që Hyseni drejtonte, por nuk mundi të mbijetonte. Pas kthimit nga spitali kunati i biznesmenit akuzoi policinë për paaftësi dhe se nuk ka ndërhyrë në kohë, raporton “bw”. “Tjetri qëlloi për një kohë të gjatë këtu dhe askush nuk bëri lëvizje”- i është drejtuar ai policisë. panorama
ma.me
