Policia e Lezhës ka zbardhur detaje në lidhje me atentatin ndaj shtetasit Florian Dushku. Militanti i LSI që ishte plagosur edhe ditën e zgjedhjeve gjatë një incidenti në Shëngjin ishte shenjestra e atentatit të së dieles po në këtë qytet.
Ndërsa personi tjetër që mbeti i plagosur, Samet Bercaj është goditur aksidentalisht.
Policia ka shoqëruar 18 persona në komisariat për të identifikuar autorët e sulmit, janë marrë videot e kamerave të sigurisë në vendngjarje ndërsa me mbështetjen e Forcave të Ndërhyrjes së Shpejtë Shkodër është ushtruar kontroll në 7 banesa dhe lokale.
Nuk dihet ende nëse plagosja e së dielës ka lidhje me ngjarjen ditën e zgjedhjeve, por hetimet vazhdojnë.
Njoftimi i policisë:
Lidhur me ngjarjen e ndodhur një ditën e diel në Shengjin ku mbeten të plagosur 2 persona, jashtë rrezikut për jeten, Policia e Lezhës ka kryer disa veprime hetimore për zbardhjen e autoresisë.
Nga tërësia e veprimeve dyshohet se objekt sulmi të ketë qenë Florian Dushku, ndërsa shtetasi Samet Bercaj 19 vjeç u plagos aksidentalisht, i gjendur rastësisht.
Për të identifikuar dhe kapur autorët e ngjarjes, janë shoqëruar 18 persona, janë kqyrur dhe administruar pamjet filmike të kamerave të sigurisë pranë vendit të ngjarjes.
Të mbështetur nga forcat e Ndërhyrjes së Shpejtë Shkodër, është ushtruar kontroll në 7 banesa dhe ambjente.
Vazhdon puna për të identifikuar dhe kapur autorët e kësaj ngjarje, si dhe për sqarimin e motiveve, fakteve dhe rrethanave.
Materialet iu referuan për ndjekje të mëtejshme Prokurorisë Rrethit Gjyqësor Lezhë, për veprat penale “Vrasjes në rrethana të tjera cilësuese e mbetur në tentativ” si dhe “Prodhimit dhe mbajtjes pa leje të armëve luftarake e municionit”.
a.ç
