Këtë të enjte u njoftua se ekspertët e policisë kanë gjetur disa sende në vendin ku ishin pozicionuar atentatorët që goditën mjetin G-Class, duke lënë katër persona të plagosur.
E ftuar në emisionin People në Euronews Albania, gazetarja Aida Topalli tha se në vendin e ngjarjes janë gjetur bishta cigaresh, sende të tjera që dyshohet se u përkasin autorëve si dhe një bosht metalik i dëmtuar.
Sipas saj, këto prova janë dërguar në laborator dhe mbetet të shihet nëse përftimet nga to do të përputhen me profile të personave në databazën e policisë.
“Ende nuk ka rezultat për sendet e gjetura në vendngjarje. Ka dyshime se këto sende i përkasin autorëve të atentatit. Ato janë dërguar në laborator dhe mbetet për t’u parë nëse këto të dhëna do të përputhen me persona që janë në databazën e policisë dhe nëse do të përputhen me ndonjë prej profileve të ADN-së të personave të skeduar. Janë gjetur bishta cigaresh, sende të tjera dhe një bosht metalik i dëmtuar. Në vendin ku kanë qëndruar vrasësit janë gjetur këto sende, që grupi hetimor pretendon se do të kenë një vlerë për hetimin dhe mund të çojnë në zbardhjen e profilit të njërit prej atentatorëve. Në çdo ngjarje ka një gabim. Mbetet të pritet një përgjigje nga laboratori, qoftë nga të dhënat e grupit hetimor”, tha gazetarja.
Ajo zbardhi dhe itinerarin e motorit të atentatorëve në ditën e ngjarjes.
“Policia e Tiranës ka zbardhur një pjesë të itinerarit të motorrit.Itinerari i motorrit është: Arbanë – Vishnje – Picallë – Sauk – Mjull Bathore – Liqeni i Farkës – Rruga e Agallarëve – dhe më pas vendi i ngjarjes, vendi ku ka ndodhur dhe ku ka goditur. Motori ka bërë atë itinerar ditën e ngjarjes. Gjatë ditëve të tjera, nuk di ta them”, tha gazetarja Aida Topalli.
