Disa orë pas vrasjes së 26-vjeçarit, Ajet Qokthi, në Torovicë të Lezhës, Shqiptarja.com ka mundur të sigurojë rrëfimin e pronarit të baxhos, Agron Qokthi, i cili njëherazi është edhe kushëri me viktimën.
Të dy ata po udhëtonin me një automjet në drejtim të Lezhës rreth orës 05:00 të mëngjesit të kësaj të marte, për të mbledhur qumështin. Atyre iu është bërë pritë nga 2 persona të maskuar dhe të armatosuir, në zonën e Torovicës, ku për pasojë mbeti i vdekur i riu Ajet Qokthi, i cili ishte pasagjer në automjet.
Pronari i baxhos, Agron Qokthi, i cili mendohet të ketë qenë objektivi i atentatorëve, tregon momentet e panikut kur në drejtim të automjetit është hapur zjarr. Ai thotë se shkak i ngjarjes mund të jetë tentativa për t’i grabitur, ndërsa hedh poshtë pretendimet për konflikte të mëparshme apo edhe ato për shkak të konkurrencës. Sipas asaj që thekson Qokthi, automjeti është qëlluar në lëvizje e sipër, pasi nuk i ka ndaluar pritës së organizuar nga autorët.
“Nuk kam konflikte me askënd. S’ka lidhje ajo që është thënë për shkak të konkurrencës. Dyshojmë se ka qenë një tentativë grabitje. Autorët kanë qenë dy persona të maskuar, të cilët na kanë dalë përpara në rrugë. Na kanë qëlluar me armë direkt në lëvizje e sipër, pasi nuk kemi ndaluar”, ka deklaruar për Report Tv, Agron Qokthi pronari i baxhos.
Zona ku ka ndodhur ngjarja është rreth 500 m nga vendi ku u vra efektiti i Forcave të Ndërhyrjes së Shpejtë, Ardian Kodra, i cili u qëllua për vdekje nga i sëmuri mendor, David Qosja./a.k
