Një nga tre personat që ndodheshin në automjetin që qëlloi në drejtim të prokurorit Arian Ndoja, shoferit të tij, Andi Maloku, dhe Aleksandër Lahos, dyshohet se ka qenë kushëriri i deputetit të Krujës, Rrahman Rraja.
Bëhet fjalë për Redjan Rrajën, 34-vjeçarin që për Policinë, por edhe për median, nuk është një emër i panjohur, të paktën gjatë tri viteve të fundit, ku rezulton i përfshirë në disa ngjarje të rënda kriminale.
Redjan Rraja është personi i parë që arrestohet nga Policia në lidhje me anëtarin e së premtes te Mbikalimi i Shkozetit, ku mbetën të plagosur prokurori Ndoja, miku i tij, Laho apo i njohur me pseudonimin “Rrumi”, por edhe si Pëllumb Muharremi, si dhe shoferi Maloku.
Rraja, ish-stomatolog i Burgut të Fushë-Krujës, që rezulton i pajisur edhe me dokumente kanadeze, është ndaluar në tentativë për t’u larguar nga Shqipëria, shkruan panorama. Burimet thanë se fillimisht është bërë një kontroll i banesës së tij në Nikël të Fushë-Krujës, me vendim të Gjykatës së Krimeve të Rënda, më pas ai është ndaluar në Portin e Durrësit.
Pasi është mbajtur disa orë i shoqëruar në Drejtorinë e Policisë së Tiranës, Prokuroria ka urdhëruar arrestimin e tij, si një nga autorët e dyshuar të atentatit ndaj prokurorit Arian Ndoja.
Ndërkohë, burime të rezervuara nga grupi hetimor thanë dje se janë identifikuar edhe dy persona të tjerë, me origjinë nga veriu i vendit, si të dyshuar për përfshirjen në ngjarje.
Prokuroria e Krimeve të Rënda regjistroi procedimin penal nr. 244/2019, për veprat penale “Vrasja e funksionarëve publikë”, “Vrasja kundër dy ose më shumë personave”, e kryer në bashkëpunim, e mbetur në tentativë” dhe “Armëmbajtja pa leje”.
g.kosovari
