Iljaz Çalit i mbetur i vrarë në një atentat të ndodhur mbrëmjen e 3 prillit në autostradën Tiranë-Durrës.
Ish-drejtori i policisë në disa qarqe të vendit, Shemsi Prençi tha se kriminalitet në Shqipëri zhvillohet herë pas here me intensitet të ndryshëm.
Përsa i përket Çalit ai tha se ky i fundit nuk ishte biznesmenë por është ofruar në bashkëpunim me bizneset e shfrytëzimit të kromit në Bulqizë për të pastruar paratë e fituara në rrugët e kultivimit të bimëve narkotike
Ai tha se në vendin tonë kemi bashkëpunim të botës së krimit të organizuar, qoftë me ndërtimet në Tiranë, apo me shfrytëzimin e minierave në zonën e Tropojës, në Has, Bulqizë, Kukës apo Mirditë.
Shemsi Prençi: Kriminalitetit në Shqipëri zhvillohet herë pas here me intensitet të ndryshëm. Kjo vjen dhe nga predispozicioni dhe angazhimi total i organizatës së policisë për kontrollin e rreptë të territorit në raport me llojin e kriminaliteteve që ndodhin. Ky person nuk ka qenë biznesmenë i shfrytëzimit të kromit, ky u është ofruar në bashkëpunim me bizneset e shfrytëzimit të kromit në Bulqizë për të pastruar paratë e fituara në rrugët e kultivimit të bimëve narkotike. Policia duhet të zhvillojë një analizë të qenësishme se kush gjeneron më shumë kriminalitet. Pra kemi bashkëpunim të botës së krimit të organizuar, qoftë me ndërtimet në Tiranë, apo me shfrytëzimin e minierave në zonën e Tropojës, në Has, Bulqizë, Kukës apo Mirditë.
Ai tha se një nga arsyet që ai dha dorëheqjen nga drejtori i policisë në qarkun Dibër ishte sepse kishte konstatuar se zyrtarë të lartë kishin aksione në kompani të shfrytëzimit të kromit në Bulqizë.
Shemsi Prençi: Para 10 vitesh unë dhashë dorëheqjen nga drejtori i policisë në qarkun Dibër, pikërisht sepse kisha konstatuar se një numër i konsideruar i zyrtarëve të lartë të shtetit, kishin aksione në disa kompani të shfrytëzimit të kromit në Bulqizë, për rrjedhojë, minierat shfrytëzoheshin në mënyra të paligjshme minierat. Licencat ishin dhënë me mbivendosje, qoftë në koordinata, qoftë në nivele të shfrytëzimit.
Këto zona ishin burim kriminaliteti dhe për faktin e vjedhjes, grabitjes së nëntokës duke iu shmangur çdo lloj tatimi, apo në aspektin ekonflikteve midis zonave që shfrytëzonin.
Ndër të tjera Prençi tha se kishte paralajmëruar se në Bulqizë dhe Tiranë do kishte vrasje, pasi kishte gjetur në kasaforta letra nga zyrtarë të lartë ku jepnin detaje për personat që janë në konflikt me njëri tjetrin.
Shemsi Prençi: Në kasafortë kam gjetur disa letra që shumë drejtues dhe punonjës shpreheshin se mes këtij dhe atij ka konflikt dhe do ketë vrasje. Në atë kohë nuk gjeta mbështetjen eprorëve të mi dhe u detyrova që ta bëjë publike.
Dhashë një deklaratë që sipas informacioneve të grumbulluara në rajonin e Bulqizës në dy tre vite do të ketë një numër të konsiderueshëm viktimash për shkak të konflikteve të mbivendosjes dhe shfrytëzimit të zonave të kromit. Në atë kohë pak më dhanë të drejtë por më vonë u vërtetuan shumë gjëra.
Që nga ajo kohë deri më sot në rajonin e Bulqizës dhe në Tiranë në zonën e Komunës së Parisit ku banojnë kryesisht pronarët e zonave të kromit kemi pasur shumë vrasje./m.j
